নিয়মীয়া বাৰ্তা, ১৫ ডিচেম্বৰঃ শোণিতপুৰৰ বালিপৰাৰ সমীপৱৰ্তী খনামুখৰ ৰাজগড়ত আজি উদ্ধাৰ কৰা হয় এডাল প্ৰকাণ্ড অজগৰ । জানিব পৰা মতে, ৰাজগড়ৰ বাসিন্দা দল বাহাদুৰ ছেত্ৰীৰ বাৰীত পুৱা ভাগত এডাল অজগৰ সাপ প্ৰত্যক্ষ কৰি লগে লগে খনামুখ আৰক্ষী চকীত খবৰ দিয়ে । লগতে সাপডালক আৱদ্ধ কৰি ৰাখে । ঘটনাস্থলীত আৰক্ষীৰ লোক উপস্থিত হৈ পৰ্যবেক্ষণ কৰাৰ পিছত স্থানীয় বনবিভাগক খবৰ দিয়ে । বাতৰি লিখাৰ সময়ত ঘটনাস্থলীত বনবিভাগৰ লোক উপস্থিত হৈ সাপডাল নিয়াৰ অন্তত বালিপৰা সংৰক্ষিত বনাঞ্চলত মুকলি কৰি দিয়ে । উল্লেখ্য যে উদ্ধাৰকৃত সাপডালৰ ওজন ১০ কিলোগ্ৰাম ।