নিয়মীয়া বাৰ্তা, ১৬ ডিচেম্বৰঃ দক্ষিণ আফ্রিকাৰ বিপক্ষে খেলিবলগীয়া আগন্তুক এদিনীয়া শৃংখলাটোত ৰোহিত শর্মাৰ নেতৃত্বত খেলিবলৈ সাজু হৈছে টীম ইণ্ডিয়াৰ প্রাক্তন অধিনায়ক বিৰাট কোহলি৷ ঘৰুৱা দলটোৱে এদিনীয়া শৃংখলাটোৰ পূর্বে খেলিবলগীয়া তিনিখনীয়া টেষ্ট মেচৰ শৃংখলাটোত অংশগ্রহণ কৰাৰ উদ্দেশ্যে কাইলৈ ভাৰতীয় দলটোৱে ৰাওনা হোৱাৰ পূর্বে বিৰাট কোহলিয়ে ঘৰুৱা দলটোৰে খেলিবলগীয়া এদিনীয়া শৃংখলাটোত ভাগ ল’ব বুলি নিজৰ স্থিতি স্পষ্ট কৰিছে৷ আজি ভাৰতীয় ক্রিকেট নিয়ন্ত্রণ ব’র্ডে আয়োজন কৰা এখন ভার্চুৱেল সংবাদ মেলত ভাগ লৈ বিৰাট কোহলিয়ে সাংবাদিকৰ কেইবাটাও প্রশ্ণৰ উত্তৰ দিয়াৰ লগতে আগন্তুক এদিনীয়া শৃংখলাটোত অংশগ্রহণ কৰিব বুলি মন্তব্য কৰে৷ দক্ষিণ আফ্রিকাত মই এদিনীয়া শৃংখলাত ভাগ ল’বলৈ সাজু আছোঁ৷ মই এদিনীয়া শৃংখলাটোত ভাগ নলওঁ বুলি নির্বাচক মণ্ডলী তথা বিচিচিআইৰ কোনো বিষয়ববীয়াক অৱগত কৰা নাছিলোঁ৷ কেইখনমান সংবাদ–পত্রত মই ব্যক্তিগত কাৰণৰ বাবে এদিনীয়া শৃংখলাটোত অংশগ্রহণ নকৰো বুলি বাতৰি প্রকাশ পাইছিল৷ সেয়া সম্পূর্ণ মিছা আছিল বুলি মন্তব্য কৰে টীম ইণ্ডিয়াৰ এদিনীয়া আৰু টি–২০ দলটোৰ প্রাক্তন অধিনায়কগৰাকীয়ে৷ উল্লেখ্য যে ভাৰত আৰু দক্ষিণ আফ্রিকাৰ মাজৰ শৃংখলাটো ১৯ জানুৱাৰীৰ পৰা আৰম্ভ হ’ব৷