বিশেষ বাৰ্তা, ২৪ ছেপ্টেম্বৰ : মালিগাঁৱৰ কামাখ্যা ৰে’ল ষ্টেচনত আজি পুনৰ নকল সোণ জব্দ কৰা হয় । দেওঘৰ উইকলী এক্সপ্ৰেছৰ পৰা নকল সোণ জব্দ কৰাৰ লগতে এজনক আটক কৰে ৰে’ল আৰক্ষীয়ে । জানিব পৰা মতে, ৰে’ল আৰক্ষীয়ে এক গোপন সূত্ৰৰ ভিত্তিত ৰে’লখনত চলাইছিল অভিযান । অভিযানত গ্ৰেপ্তাৰ কৰে বিহাৰৰ মোহাৰিল কুমাৰ তান্টি নামৰ এজন লোকক । সৰবৰাহকাৰীজনৰ পৰা জব্দ হয় নাওসদৃশ এটুকুৰা নকল সোণ । নকল সোণখিনিৰ ওজন প্ৰায় ২ কেজি হ’ব বুলি জানিব পৰা গৈছে । ৰঙিয়াৰ পৰা দেওঘৰলৈ যোৱাৰ পৰিকল্পনা কৰিছিল সৰবৰাহকাৰী মোহাৰিল কুমাৰে । নকল সোণখিনি আচল বুলি বিক্ৰী কৰাৰ পৰিকল্পনা কৰিছিল । বৰ্তমান সৰবৰাহকাৰী মোহাৰিল কুমাৰক সোধা-পোছাৰ বাবে গুৱাহাটী জি আৰ পি থানালৈ লৈ যোৱা হৈছে ।