নিয়মীয়া বাৰ্তা, ১৯ জানুৱাৰীঃ চাচনীৰ মেৰবিল খেলপথাৰত শনিবাৰে বিশাল ‘কা’বিৰোধী সমাৱেশত হাজাৰ হাজাৰ লোকে অংশগ্রহণ কৰে৷ ডিব্রুগড জিলাৰ ভিতৰতে বৃহত্তৰ মৌজা বুলি পৰিচিত চাচনী মৌজাৰ ৰাইজৰ সহযোগত আছুৰ উদ্যোগত আয়োজিত ‘সিংহনাদ’ নামৰ এই ‘কা’বিৰোধী প্রতিবাদত অংশগ্রহণ কৰে আছুৰ সাধাৰণ সম্পাদক লুৰিণজ্যোতি গগৈয়ে৷
মেৰবিলৰ সভাত উপস্থিত হৈ লুৰিণজ্যোতি গগৈয়ে নিজৰ ভাষণত শ্বহীদসকললৈ শ্রদ্ধা জনাই মুখ্যমন্ত্রী সর্বানন্দ সোণোৱাল আৰু বিত্তমন্ত্রী হিমন্ত বিশ্ব শর্মাক আক্রমণৰ লক্ষ্য কৰি লয়৷ আছু নেতাগৰাকীৰ স্পষ্ট অভিযোগ– শ্বহীদৰ ত্যাগৰ মূল্য দিব নাজানে আছুৰ মজিয়াৰ পৰা যোৱা মুখ্যমন্ত্রী সর্বানন্দ সোণোৱালে৷ যাৰ বাবে এতিয়া ধর্মৰ আধাৰত অসমত বিদেশী সংস্থাপন কৰিবলৈ ষড়যন্ত্রত নামিছে সোণোৱালে৷ দিছপুৰৰ চৰকাৰখন মোদী–শ্বাহৰ আজ্ঞাবাহী হ’লেও অসমৰ ৰাইজ মোদী–শ্বাহৰ ওচৰত দায়বদ্ধ নহয় বুলি ব্যক্ত কৰি লুৰিণজ্যোতিয়ে কয়– ‘স্বাভিমানী অসমীয়াই নিজৰ আত্মপৰিচয় কেতিয়াও হেৰুৱাব নিবিচাৰে৷ তাৰ কাৰণে শাসক পক্ষৰ সকলো ধৰণৰ ষড়যন্ত্র ওফৰাই সংগ্রাম চলিবই৷’
ইফালে, কালিৰ এই সভাতে আছুৰ নেতৃত্বক গতাই দিয়া হয় চাচনী মৌজাত সংগৃহীত ধানৰ ৬৪৫টা বস্তা৷ উল্লেখ্য যে ‘কা’বিৰোধী ন্যায়িক যুঁজখনত আর্থিক সহায় হিচাপে আগবঢ়াবৰ কাৰণে প্রায় ৮০খন গাঁওসমৃদ্ধ চাচনী মৌজাৰ প্রতিঘৰৰ পৰা সংগ্রহ কৰা হৈছিল এদোনকৈ (প্রায় চাৰি কেজি) ধান৷ ৩ জানুৱাৰীৰ পৰা আৰম্ভ হোৱা এই অভিযানত তিনি লক্ষাধিক টকা মূল্যৰ ধান সংগ্রহ হয়৷ ‘কা’বিৰোধী আন্দোলনত খিলঞ্জীয়া ৰাইজৰ এনে সঁহাৰি প্রত্যক্ষ কৰিয়ে লুৰিণজ্যোতি গগৈয়ে অসমবাসীক আহ্বান জনায় চাচনীৰ ৰাইজৰ ভূমিকা অনুসৰণ কৰিবলৈ৷