নিয়মীয়া বাৰ্তা, ২১ নৱেম্বৰঃ “কেব প্ৰসংগক লৈ বিজেপিৰ সৈতে অগপ দলে মিত্ৰতা ভংগ কাৰৰ পাছত পুনৰ মিত্ৰতাত আবদ্ধ হোৱাৰ সময়তে কেব উত্থাপন কৰাৰ সময়ত অগপৰ সৈতে আলোচনাৰ প্ৰতিশ্ৰুতি দিছিল । গতিকে বিজেপিয়ে এতিয়াও বিধেয়কখথন সন্দৰ্ভত অগপৰ সৈতে আলোচনা কৰা নাই । এনে অৱস্থাত বিজেপিয়ে আমাৰ সৈতে আলোচনা নকৰিলে আমি স্থিতি স্পষ্ট কৰিম ।”- বুধবাৰে শিৱসাগৰত হোৱা এক চৰকাৰী অনুষ্ঠানত অংশ লৈ এই মন্তব্য অগপৰ কাৰ্যকৰী সভাপতি কেশৱ মহন্তৰ ।
নাগৰিকত্ব সংশোধনী বিধেয়কক লৈ অগপৰ সভাপতি অতুল বৰাই বিজেপি নেতৃত্বৰে আলোচনা কৰিব বুলি কৰা মন্তব্যৰ বিপৰীতে দলৰ স্থিতি অটুট আছে বুলিহে উল্লেখ কৰে মন্ত্ৰী কেশৱ মহন্তই । ইপিনে অতুল বৰাৰ এনে বক্তব্যৰে কাৰ্যতঃ ইয়াকে স্পষ্ট কৰিছিল যে নাগৰিকত্ব সংশোধনী বিধেয়কবিৰোধী আন্দোলনৰ পৰা এইবাৰ অগপ আঁতৰত থাকিব । আঞ্চলিক দলটোৰ ভিতৰতে এনে বিপৰীত ভাষ্যই স্বাভাৱিকতে দলীয় কৰ্মীসকলক যথেষ্ট বিমোৰত পেলাইছে ।