নিয়মীয়া বার্তা, ১৯ মার্চঃ ছিপাঝাৰত মাতৃ–কন্যাই মিলি গামোচাৰ পৰা প্রস্তুত কৰা ফুলাম মাস্ক এতিয়া জনপ্রিয় হৈ পৰিছে ৷ উল্লেখ্য যে ছিপাঝাৰৰ ভুক্তাবাৰীৰ ভাৰতী চহৰীয়া আৰু তেওঁৰ কন্যা তাপপ্রিয়া চহৰীয়াই নিজা ঘৰতে গামোচাৰ আর্হিৰ এই মাস্কসমূহ তৈয়াৰ কৰিছে ৷ দুটি সন্তানসহ জীৱন যাপন কৰা ভাৰতী চহৰীয়া এগৰাকী উদ্যোগী মহিলা ৷ চিলাই কামত মহিলাগৰাকীৰ আছে দক্ষতা ৷ একেদৰে এটা স্বেচ্ছাসেৱী অনুষ্ঠানৰ লগত জডিত কন্যা তাপপ্রিয়াৰো অভিজ্ঞতা আছে কাটিং আৰু চিলাইত ৷ দুই মাতৃ–কন্যা মিলি সম্পূর্ণ নিজা চিন্তাৰে আৰু থলুৱা পদ্ধতিৰে প্রস্তুত কৰি উলিয়াইছে এনে মাস্ক ৷
লক্ষণীয় যে ক’ৰোনা ভাইৰাছৰ আতংকৰ উপৰি ধূলিময় পৰিৱেশৰ বাবে শেহতীয়াকৈ ৰাজ্যত মাস্কৰ চাহিদা বৃদ্ধি পাইছে ৷ তেনে ক্ষেত্রত গামোচাৰ চানেকি সমৃদ্ধ মাস্কে ক’ৰোনা ভাইৰাছক সম্পূর্ণভাৱে প্রতিৰোধ কৰিব নোৱাৰিলেও ধূলি আৰু বতাহৰ লগত সততে আমাৰ শৰীৰত প্রভাৱ পেলোৱা বীজাণু প্রতিৰোধ কৰিব পাৰিব ৷ এই সন্দর্ভত উদ্যোগী মহিলাগৰাকীয়ে জানিবলৈ দিয়া মতে, একোখন গামোচাৰ দাম সাধাৰণতে আশী–নব্বৈৰ পৰা আৰম্ভ হয় ৷ কিন্তু তেওঁলোকে প্রস্তুত কৰা এই মাস্কৰ দাম নির্ধাৰণ কৰিছে পঞ্চাশ টকাকৈ ৷ আৰু এখন গামোচাৰ পৰা ন্যূনতম পাঁচখন মাস্ক তৈয়াৰ হয় ৷ অর্থাৎ ব্যৱসায়িকভাৱেও লাভজনক ৷ কিন্তু মাস্কসমূহ প্রস্তুত কৰোঁতে যথেষ্ট সময়ৰ প্রয়োজন হয়, যাৰ বাবে উৎপাদনৰ পৰিমাণ কম হয় ৷ কিন্তু দেখিবলৈ আকর্ষণীয় আৰু জাতীয় আৱেগসমৃদ্ধ এই মাস্ক ক্রয় কৰিবলৈ এতিয়া ভুক্তাবাৰীৰ এই পৰিয়ালটোত ভিৰ কৰিছে সর্বসাধাৰণ ৰাইজে ৷
তদুপৰি প্রচাৰ হোৱাৰ লগে লগে ভিন্ন অর্ডাৰো আহিছে ৷ উল্লেখ্য যে ভাইৰাছৰ আতংকই এইবেলি ৰঙালী বিহুৰ উৎসাহ ম্লান পেলালেও জাতীয় স্বাভিমান গামোচাসমৃদ্ধ মাস্কে যেন বিহুৰ পৰিৱেশকো অইন এক মাত্রা প্রদান কৰিছে ৷ বিশেষকৈ মূৰত ভমকাফুলীয়া গামোচাৰ পাগুৰি পৰাৰ বঞ্চিত হ’লেও মুখত গামোচাৰ আর্হিৰ মাস্ক মাৰি হ’লেও বিহুক আদৰিব পাৰিব বিহুৱাই ৷