নিয়মীয়া বাৰ্তা, ১০ জানুৱাৰীঃ ৰাষ্ট্রীয়–আন্তঃৰাষ্ট্রী প্রতিযোগিতাত পদক জয়েৰে অসমলৈ গৌৰৱ কঢ়িয়াই অনা তাৰকা দৌৰবিদ হিমা দাসে খেলো ইণ্ডিয়া য়ুথ গেমছৰ বর্ণিল উদ্বোধনী অনুষ্ঠানৰ শিখা বহন কৰিব৷
টকিঅ’ অলিম্পিকৰ বাবে ত্রিবান্দ্রমত কঠোৰ অনুশীলনত ব্যস্ত ‘ধিং এক্সপ্রেছ’ হিমা ইতিমধ্যে খেলো ইণ্ডিয়াৰ উদ্বোধনী অনুষ্ঠানৰ বাবে গুৱাহাটীত উপস্থিত হৈছে৷ কালি তেওঁ শক্তিপীঠ কামাখ্যা দর্শন কৰে৷
অৱশ্যে খেলো ইণ্ডিয়াত হিমা দাসে প্রতিদ্বন্দ্বিতা আগবঢ়োৱাৰ পৰা বিৰত থাকিব৷
উল্লেখ্য যে অর্জুন বঁটা বিজয়ী অসম কন্যা হিমা দাসৰ সমান্তৰালকৈ আজিৰ এই অনুষ্ঠানত আন কেইবাগৰাকীও আগশাৰীৰ ক্রীড়াবিদক দেখিবলৈ পোৱাৰ সম্ভাৱনা আছে৷ ইয়াৰ ভিতৰত অন্যতম হ’ল– মহিলা বক্সাৰ এম চি মেৰীকম, বক্সাৰ শিৱ থাপা, প্রাক্তন বেডমিণ্টন খেলুৱৈ পুলেল্লা গোপীচান্দ আদি৷