নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

নাজিৰাত গড়কাপ্টানী মন্ত্রীৰ বিশাল বাইক ৰেলী

নিয়মীয়া বার্তা,২৯ ফেব্রুৱাৰীঃ কংগ্রেছৰ দখলত থকা নাজিৰাত শুকুৰবাৰে বিশাল বাইক ৰেলীত অংশ লৈ ৰাজ্যৰ জ্যেষ্ঠ মন্ত্রী ড০ হিমন্ত বিশ্ব শর্মাই বিজেপিৰ শক্তি প্রদর্শন কৰিলে ৷ প্রায় ১,৫০০ যুৱকৰ এটা বাইক ৰেলীৰ সময়তে গড়কাপ্টানী মন্ত্রী ড০ শর্মাই অঞ্চলটোৰ শোচনীয় অৱস্থাত থকা বাট–পথসমূহ পৰিদর্শন কৰে ৷ বালিঘাট তিনিআলিত উপস্থিত হোৱাৰ পাছতে নাজিৰা সমষ্টিৰ হাজাৰ হাজাৰ দলীয় কর্মীৰ লগতে স্থানীয় ৰাইজে তেওঁক উষ্ম সম্বর্ধনা জনায় ৷ ইয়াৰ পাছতে প্রায় ১২.৩০ বজাত আৰম্ভ হোৱা বাইক ৰেলীত ড০ শর্মাই যোৰহাট লোকসভা সমষ্টিৰ সাংসদ তপন কুমাৰ গগৈয়ে চলোৱা জাৱা মটৰচাইকেলৰ পাছৰ আসনত বহি বাট–পথসমূহ পৰিদর্শন কৰে৷ বাইক ৰেলীয়ে মেজেংগা, ফুকনৰ পুখুৰী, চেপাঙনিৰ মাজেদি ধোদৰ আলি, ঐতিহাসিক বাঁহগড়, বাৰেঘৰ সত্র, খটখটী পুখুৰী, মাদুৰি গোহাঁই আলি, ৰেৱতী কপহুৱা হৈ নাজিৰা নগৰত সোমাই প্রায় দুঘণ্টীয়া এই যাত্রাৰ সামৰণি মাৰে অ’ এন জি চিৰ অতিথি গৃহত ৷ বাইক ৰেলীত অংশগ্রহণকাৰীসকলে বিজেপি জিন্দাবাদ, বিজেপি লং লিভ আদি ধ্বনি দিয়ে ৷ অনানুষ্ঠানিক কথা–বার্তাত মন্ত্রীজনে নাজিৰাৰ বাট–পথৰ শোচনীয় অৱস্থাৰ বিষয়ে স্বচক্ষে অধ্যয়ন কৰিবলৈকে এই কার্যসূচী গ্রহণ কৰা বুলি সাংবাদিকক জনায় ৷ দলীয় কর্মীৰ উৎসাহ–উদ্দীপনাৰ মাজত মন্ত্রী ড০ শর্মাই অংশ লোৱা সমদলত মন্ত্রী যোগেন মহন, লোকসভাৰ সাংসদ তপন কুমাৰ গগৈ, ৰাজ্যসভাৰ সাংসদ কামাখ্যাপ্রসাদ তাছা, শিৱসাগৰ জিলা বিজেপিৰ সভানেত্রী সুৰভি ৰাজকুমাৰী, বিজেপি যুৱ মর্চাৰ উপ–সভাপতি ময়ূৰ বৰগোহাঁই, ডাঃ প্রবীণ কোঁৱৰ, বলীন কলিতা, বিজেপি চাহ মর্চাৰ উপ–সভাপতি প্রহ্লাদ গোৱালাই সহযোগ কৰে ৷

You might also like