নিয়মীয়া বাৰ্তা ১৩ ফেব্ৰুৱাৰীঃ দুস্পাপ্য সোণালী বান্দৰৰ ৰম্যভূমি কাকৈজানা বনাঞ্চলত বুধবাৰে আবেলি বিদ্যুৎ বিভাগৰ চৰম গাফিলতিৰ বাবে উন্মুক্ত তাৰত লাগি মৃত্যু হৈছে এটি সোণালী বান্দৰৰ।এটি মাতৃ সোণালী বান্দৰে বিদ্যুৎপিষ্ট হৈ মৃত্যু হোৱাৰ পিছত মাকৰ কোলাত থকা পোৱালি এটাৰ দৈৱক্ৰমে ৰক্ষা পৰে। যোৱা কালি আহত পোৱালিটো সোণালী বান্দৰৰ জাক এটাই কিছু দূৰলৈ লৈ যায় যাৰ বাবে ৰাইজে উদ্ধাৰ কৰিব পৰা নাছিল। আজি স্থানীয় ৰাইজে অভিযান চলাই আহত পোৱালিটোক উদ্ধাৰ কৰে । পিছত বন বিভাগৰ লোক ঘটনাস্থলীত উপস্থিত হৈ পোৱালিটো ৰাইজৰ পৰা উদ্ধাৰ কৰে। আহত পোৱালীটো পশু চিকিৎসকৰ দ্বাৰা পৰীক্ষা কৰোৱাৰ পিছত পোৱালিটোক গুৱাহাটী ৰাজ্যিক চিৰিয়াখানাত ৰখাৰ ব্যৱস্থা কৰা হৈছে।