বিশেষ বাৰ্তা, ১৪ জুনঃ শুৱালকুছিৰ চাৰি যুৱকে কামৰূপৰ শিঙিমাৰীৰ বৰচুবুৰিৰ এগৰাকী ২১ বছৰীয়া যুৱতীক অপহৰণ কৰি নি গুৱাহাটীৰ লজ এটাত উদ্ধাৰ হোৱা ঘটনাই সমগ্ৰ অঞ্চলতে তীব্ৰ প্ৰতিক্ৰিয়াৰ সৃষ্টি কৰিছে৷ প্ৰাপ্ত তথ্য মতে শুৱালকুছিৰ নাৰায়ণ বৈশ্য (২১) নামৰ যুৱকজনৰ লগত শিঙিমাৰী বৰচুবুৰিৰ নিবাসী চম্পক বৰ্মনৰ একমাত্ৰ জীয়ৰী তথা ৰামসৰস্বতী একাডেমীৰ উচ্চতৰ মাধ্যমিক প্ৰথম বৰ্ষৰ ছাত্ৰীগৰাকীৰ লগত দীৰ্ঘদিনীয়া সম্পৰ্ক৷ এই সূত্ৰে যুৱকজনে যুৱতীগৰাকীৰ ঘৰলৈ অহা-যোৱাও কৰে৷ যোৱা ১২ জুনৰ সন্ধিয়া প্ৰায় ৭ বজাত নাৰায়ণ বৈশ্যই তেওঁৰ বন্ধু ডেভিদ ডেকা (২২), ঋষি বৈশ্য (১৯) উদ্দীপ্ত বিক্ৰম বৈশ্য (২১)ক লগত লৈ এ এছ ০১-ই এছ ৮৬৮৭ নম্বৰৰ বলৰো গাড়ী এখনৰে শুৱালকুছিৰ পৰা গৈ শিঙিমাৰীত যুৱতীগৰাকীক জোৰকৈ গাড়ীত উঠাই নিমিষতে অন্তৰ্ধান হয়৷ নিশা ঘৰত যুৱতীগৰাকী নথকাত পৰিয়ালৰ লোকে বহুত বিচাৰ-খোঁচাৰ কৰিয়ো যুৱতীগৰাকীৰ কোনো সন্ধান নোপোৱাত পিতৃ চম্পক বৰ্মনে দদৰা আৰক্ষী চকীত ছোৱালীজনী সন্ধানহীন হোৱা বুলি এখন এজাহাৰ দাখিল কৰে৷ দদৰাৰ আৰক্ষীয়ে উক্ত এজাহাৰৰ ভিত্তিত ২০৪/২৪ আই পি চি ৩৬৫ নম্বৰত এটি গোচৰ ৰুজু কৰি জোৰ তদন্ত চলাই কালি সন্ধিয়া গুৱাহাটী দিছপুৰস্হিত পোড্ডাৰ ইন লজৰ এটা কোঠাৰ পৰা যুৱতীগৰাকীৰ সৈতে চাৰিও যুৱকক উদ্ধাৰ কৰিবলৈ সক্ষম হয়৷ লগতে বলৰোখনো তাৰ পৰা উদ্ধাৰ কৰে৷ পিছত আৰক্ষীয়ে গাড়ীসহ আটাইকেইগৰাকীক দদৰা আৰক্ষী চকীলৈ আনি যুৱতীগৰাকীক স্বাস্থ্য পৰীক্ষাৰ বাবে শিঙিমাৰী চিকিৎসালয়ত ভৰ্ত্তি কৰে৷ আৰক্ষীয়ে ঘটনাটোৰ মূল অভিযুক্ত নাৰায়ণ বৈশ্যক গ্ৰেপ্তাৰ কৰি জেল-হাজোতলৈ প্ৰেৰণ কৰাৰ বিপৰীতে বাকী তিনিজনক সোধাপোছা কৰাৰ পিছত মুকলি কৰি দিয়ে৷ যুৱপ্ৰজন্মৰ এনে নৈতিক স্খলন কাৰ্যই সচেতন মহলক গভীৰ উদ্দিন্ন কৰি তুলিছে ৷
প্ৰেৰক দিলীপ মেধি