নিয়মীয়া বাৰ্তা, ১৮ জানুৱাৰীঃ ৰাজ্যৰ যুৱপ্রজন্মক উৎসাহিত কৰাৰ লক্ষ্যৰে তিনিদিনীয়া কার্যসূচীৰে অনুষ্ঠিত হ’ব মুখ্যমন্ত্রীৰ যুৱ সমাৰোহ ৷ গুৱাহাটীৰ সৰুসজাই ক্রীড়া প্রকল্পত অহা ১৯, ২০ আৰু ২১ জানুৱাৰীত এই সমাৰোহ অনুষ্ঠিত হ’ব ৷ শুকুৰবাৰে দিছপুৰস্থিত ভোগেশ্বৰী ফুকননী ইনড’ৰ ষ্টেডিয়ামত এক সংবাদ মেলত এই কথা সদৰী কৰে ক্রীড়া আৰু যুৱ কল্যাণ উপদেষ্টা সমিতিৰ সদস্য সচিব লক্ষ্য কোঁৱৰে ৷ মুখ্যমন্ত্রীৰ যুৱ সমাৰোহৰ কার্যসূচী সন্দর্ভত সদৰী কৰি তেওঁ কয়– অহা ১৯ জানুৱাৰীৰ পুৱা ১০.৩০ বজাত যুৱ সমাৰোহৰ উদ্বোধনী অনুষ্ঠান অনুষ্ঠিত হ’ব ৷ ৰাজ্যৰ বিত্তমন্ত্রী ড০ হিমন্ত বিশ্ব শর্মা এই অনুষ্ঠানত মুখ্য অতিথি হিচাপে উপস্থিত থাকিব ৷ ২১ জানুৱাৰীৰ সামৰণী অনুষ্ঠানত মুখ্য অতিথি হিচাপে উপস্থিত থাকিব মুখ্যমন্ত্রী সর্বানন্দ সোণোৱাল ৷ তদুপৰি সামৰণী অনুষ্ঠানত অংশগ্রহণ কৰিব বলীউডৰ জনপ্রিয় অভিনেতা বিবেক অবেৰয়ে ৷ তিনিদিনীয়া সমাৰোহখনত অনুষ্ঠিত হ’বলগীয়া বিভিন্ন ক্ষেত্রৰ আলোচনা–চক্রসমূহত্ বিশেষজ্ঞসকলে অংশগ্রহণ কৰি বক্তৃ তা প্রদান কৰিব ৷ তেওঁলোকে অংশগ্রহণকাৰী শিক্ষার্থীৰ সৈতে মত বিনিময় কৰিব ৷ সংবাদ মেলত সচিবজনে সদৰী কৰা অনুসৰি ৰাজ্যৰ মুঠ ১১০খন মহাবিদ্যালয়ৰ লগতে কটন, গুৱাহাটী, ডিব্রুগড়, তেজপুৰ বিশ্ববিদ্যালয়, যোৰহাট কৃষি বিশ্ববিদ্যালয় আৰু মহিলা বিশ্ববিদ্যালয়ৰ নির্বাচিত প্রতিনিধিসকলে যুৱ সমাৰোহত অংশগ্রহণ কৰিব ৷ ৫ শতাধিক শিক্ষার্থীয়ে মুখ্যমন্ত্রীৰ যুৱ সমাৰোহত অংশগ্রহণ কৰিব ৷