🔹 উদণ্ড যুৱকে অন কেমেৰা ভাঙিলে দুৰ্ঘটনা সংঘটিত কৰা বাহন
নিয়মীয়া বাৰ্তা, ৪ জানুৱাৰী : ৰূপহীহাটৰ তামুলীটুপত আজি দুপৰীয়া এক ভয়ংকৰ পথ দুৰ্ঘটনা সংঘটিত হয় ৷ উক্ত পথ দুৰ্ঘটনাক কেন্দ্ৰ কৰি এক উত্তপ্ত পৰিস্থিতিৰ সৃষ্টি হয়। তামুলীটুপৰ এখন বিয়াৰ পেণ্ডেল নিৰ্মাণ কৰি থকা অৱস্থাত এএছ-০২-৯২৩৩ নম্বৰৰ ব্ৰেজা চাৰিচকীয়া বাহন এখনে নিয়ন্ত্ৰণ হেৰুৱাই বিয়াৰ পেণ্ডেলৰ কাম কৰি থকা তিনিজন লোকক খুন্দিয়াই ঘটনাস্থলীৰ পৰা পলায়নৰ চেষ্টা কৰে ৷ দুৰ্ঘটনা সংঘটিত কৰা গাড়ীখনক বাধা দিবলৈ যোৱা আন তিনিজন লোককো খুন্দিয়াই পলায়নৰ চেষ্টা কৰে বাহনখনে। দুৰ্ঘটনা সংঘটিত কৰি পলায়নৰ চেষ্টা চলোৱা বাহনখন পাঁচ-ছয়জনীয়া উত্তেজিত এটি যুৱকৰ দলে ভাঙি লণ্ড-ভণ্ড কৰে । কালাম মাষ্টৰ নামৰ লোকজনৰ গাড়ীত বহি থকা অৱস্থাত বাহনখনে ছয়জনক খুন্দিয়াই পলায়নৰ চেষ্টা কৰাত খৰ্গহস্ত হৈ উদণ্ড যুৱকৰ দলে অন কেমেৰা ভাঙি লণ্ডভণ্ড কৰে বাহনখন৷ ঘটনাক কেন্দ্ৰ কৰি সমগ্ৰ অঞ্চলটোত এক চেপা উত্তেজনা বিৰাজ কৰি আছে ৷ আনফালে পথ দুৰ্ঘটনাত আহত হোৱা লোকসকলক ৰাইজৰ তৎপৰতাত চিকিৎসাৰ বাবে নগাঁও মেডিকেল কলেজলৈ প্ৰেৰণ কৰিছে ৷ ঘটনাস্থলীত আৰক্ষীৰ এটি বৃহৎ দল উপস্থিত হৈ পৰিস্থিতি নিয়ন্ত্ৰণ কৰে ৷
প্ৰেৰক জহিৰুল ইছলাম