নিয়মীয়া বাৰ্তা, ৭ জুলাই : গোৱালপাৰা জিলাৰ কৃষ্ণাই বজাৰত যোৱানিশা সংঘটিত হয় এক ভয়ংকৰ অগ্নিকাণ্ড ৷ কৃষ্ণাই বজাৰৰ মাজমজিয়াত থকা মিত্ৰ কমপ্লেক্স নামৰ ব্যৱসায়িক প্ৰতিষ্ঠানৰ এখন ইলেকট্ৰনিক দোকানত সংঘটিত হয় এই অগ্নিকাণ্ড ৷ অগ্নিকাণ্ডত লাখ লাখ টকাৰ ইলেকট্ৰনিক সামগ্ৰী জুইত জাহ যায় ৷ ভয়ংকৰ অগ্নিকাণ্ডত দোকানৰ ভিতৰত থকা সকলো সামগ্ৰী নিমিষতে জুইত জাহ যায় ৷ কথমপি ৰক্ষা পৰে কাষতে থকা আন কেইবাখনো ব্যৱসায়িক প্ৰতিষ্ঠান ৷ মাজনিশা মিত্ৰ কমপ্লেক্সৰ চৌপাশে ধোঁৱা ওলোৱা প্ৰত্যক্ষ কৰি স্থানীয় লোকৰ মাজত হাহাকাৰ লাগে ৷ পিছত ঘটনাস্থলীত আৰক্ষীৰ লোক উপস্থিত হৈ অগ্নিনিৰ্বাপক বাহিনীক খবৰ দিয়ে ৷ পিছত কৃষ্ণাই আৰক্ষীৰ তৎপৰতাত তিনিখনকৈ অগ্নিনিৰ্বাপক বাহিনীৰ বাহন উপস্থিত হৈ জুই নিৰ্বাপণ কৰিবলৈ সক্ষম হয় যদিও ইলেকট্ৰনিক দোকানৰ ভিতৰত থকা সকলো সামগ্ৰী জুইত জাহ যায় ৷ কেইবালক্ষ টকাৰ সামগ্ৰী আছিল ইলেকট্ৰনিক দোকানত ৷ শ্বৰ্ট চাৰ্কিটৰ ফলতে এই অগ্নিকাণ্ড সংঘটিত হয় ৷
প্ৰেৰক বেনজিন বড়ো