নিয়মীয়া বাৰ্তা ডিজিটেল, ১৩ ফেব্ৰুৱাৰীঃ বিহুৰ পাছত এইবাৰ ঝুমুইৰ নাচৰ জৰিয়তে বিশ্ব অভিলেখ গঢ়িবলৈ সাজু হৈছে ৰাজ্য চৰকাৰ৷ এই লক্ষ্যৰে ২৪ ফেব্রুৱাৰীত সৰুসজাই ষ্টেডিয়ামত অনুষ্ঠিত হ’ব ‘ঝুমইৰ বিনন্দিনী’৷ ৮ হাজাৰ শিল্পীয়ে ঝুমুইৰ নাচেৰে বিশ্ব অভিলেখ গঢ়াৰ লক্ষ্যৰে ভাগ ল’ব অনুষ্ঠানত৷ প্রধানমন্ত্রী নৰেন্দ্র মোদীৰ উপস্থিতিত হ’বলগা এই বিশাল তথা আকর্ষণীয় অনুষ্ঠানটোৰ বাবে ইতিমধ্যে প্রস্তুতি সম্পূর্ণ কৰি তুলিছে ৰাজ্য চৰকাৰে৷ আজি ‘ঝুমুইৰ বিনন্দীয়া’ অনুষ্ঠানৰ এক পর্যালোচনা বৈঠকত অংশগ্রহণ কৰি প্রস্তুতিৰ সবিশেষ তথ্য সংগ্রহ কৰে মন্ত্রী অশোক সিংহলে৷ এই সন্দর্ভত মন্ত্রীগৰাকীয়ে এক সংবাদ মেলত কয় যে ২১ ফেব্রুৱাৰীৰ পুৱাৰে পৰা ২৩ ফেব্রুৱাৰীলৈ তিনিদিন ‘ঝুমুইৰ বিনন্দীয়া’ৰ আখৰা চলিব৷ আনহাতে ২৩ ফেব্রুৱাৰীৰ দিনটোত সম্পূর্ণ ঝুমুইৰ নাচৰ সাজ–পোছাকেৰে আখৰাত অংশ ল’ব লাগিব শিল্পীসকলে৷ মন্ত্রীগৰাকীয়ে প্রকাশ কৰা অনুসৰি ২০ ফেব্রুৱাৰীৰ নাচত অংশগ্রহণ কৰিবলগা সকলো শিল্পী গুৱাহাটীত উপস্থিত হ’ব লাগিব৷ তেওঁলোকৰ বাবে গুৱাহাটীৰ বিভিন্ন হোটেল, ৰিজ’ৰ্ট, হোষ্টেলত থকা আৰু খোৱাৰ ব্যৱস্থা কৰা হৈছে৷ চাহ উদ্যোগৰ ২০০ বছৰ উপলক্ষে আয়োজন কৰা এই ‘ঝুমুইৰ বিনন্দিনী’ অনুষ্ঠানৰ ২৪ ফেব্রুৱাৰীত প্রধানমন্ত্রী নৰেন্দ্র মোদীয়ে শুভাৰম্ভ কৰিব৷ প্রধানমন্ত্রীগৰাকীৰ্ লগত এই অনুষ্ঠানত অংশ ল’ব এডভাণ্টেজ আছাম ২.০লৈ অহা অভ্যাগতসকলেও৷ কেইবাজনো বিদেশী ৰাষ্ট্রৰ প্রতিনিধি তথা উদ্যোগপতিয়ে ইয়াৰ আগতেই গুৱাহাটীত উপস্থিত হ’ব৷ এইসকল বিদেশী অতিথি বিশ্ব অভিলেখৰ সাক্ষী হ’ব তথা এক মধুৰ ক্ষণত উপস্থিত থকাৰ বাবে ৰাজ্য চৰকাৰে জনোৱা অনুৰোধ অতিথিসকলে গ্রহণ কৰিছে৷