বোকাজানত অগপৰ কৰ্মী সভাঃ কাৰ্বি পৰিষদীয় নিৰ্বাচনত দলৰ সাংগঠনিক ভেটি শক্তিশালী থকা সমষ্টিত দলে প্ৰতিদ্বন্দ্বিতা কৰাৰ চিন্তা-চৰ্চা

নিয়মীয়া বাৰ্তা, ৫ মেঃ আজি বোকাজানত অসম গণ পৰিষদৰ বোকাজান বিধান পৰিষদৰ এখন কৰ্মী সভা অনুষ্ঠিত হয়। সভাত অগপৰ সভাপতিৰ নিৰ্দেশমৰ্মে অন্যতম উপ-সভাপতি ড° নৃপেন বৰুৱা আৰু সম্পাদক নুৰুল চুলতানে আজি অংশগ্ৰহণ কৰে৷ কাৰ্বি আংলং স্বায়ত্তশাসিত পৰিষদৰ আগন্তুক নিৰ্বাচনত মিত্ৰজোঁটৰ অংশীদাৰ অগপৰ বোকাজান বিধান পৰিষদৰ কৰ্মীসকলৰ লগত মতবিনিময় কৰি সংগঠিত ৰূপ দেখি উৎসাহিত হয় বুলি মন্তব্য কৰে কেন্দ্ৰীয় নেতৃত্বই৷ আগন্তুক কাৰ্বি পৰিষদীয় নিৰ্বাচনত দলৰ সাংগঠনিক ভেটি শক্তিশালী থকা সমষ্টিত দলে প্ৰতিদ্বন্দ্বিতা আগবঢ়োৱাৰ লগতে মিত্ৰজোঁট বিজেপিৰ লগত সহযোগিতাৰে নিৰ্বাচনত অংশগ্ৰহণ কৰিব বুলিও মন্তব্য কৰে কেন্দ্ৰীয় নেতৃত্বই। বোকাজান বিধান পৰিষদৰ অগপৰ সভাপতি বিনয় বৰাৰ সভাপতিত্বত অনুষ্ঠিত কৰ্মীসভাত অংশ লয় কেন্দ্ৰীয় সমিতিৰ কাৰ্য্যনিৰ্বাহক সদস্য স্থানীয় যুৱ নেতা প্ৰশান্ত বৰা, কেন্দ্ৰীয় সম্পাদক চন্দ্ৰ সিং ইংতি, দেওপানী পৰিষদীয় সমষ্টিৰ বিগত নিৰ্বাচনৰ অগপৰ প্ৰাৰ্থী প্ৰহ্লাদ বাইছাৰ লগতে দলৰ স্থানীয় নেতা আৰু ভাতৃ-ভগ্নী সংগঠনৰ সভাপতি, সম্পাদকসকলে৷

##প্ৰাণদ্বীপ চেতিয়া