নিয়মীয়া বাৰ্তা, ১ মাৰ্চঃ পৌৰসভা নিৰ্বাচনৰ দিন চমু চাপি অহাৰ ল’গে ল’গে ধুবুৰী পৌৰসভাৰ ৱাৰ্ডে ৱাৰ্ডে তীব্ৰতৰ হৈছে নিৰ্বাচনী প্ৰচাৰ। ইয়াৰ মাজতে যোৱাকালিৰে পৰা ধুবুৰীত দলীয় প্ৰচাৰ চলাই থকা অগপৰ প্ৰাক্তন মন্ত্ৰী তথা দলটোৰ ৰাজ্যিক সাধাৰণ সম্পাদক নুৰুল হুছেইনে আজি ধুবুৰীত এক সংবাদমেল সম্বোধন কৰে। অগপৰ ধুবুৰীস্থ জিলা কাৰ্যালয়ত আয়োজিত সেই সংবাদমেলখনত এইবাৰ ধুবুৰীত অগপই ভাল ফল কৰিব বুলি আশা প্ৰকাশ কৰা পোৱা যায় অগপ নেতাগৰাকীয়ে। আনহাতে ধুবুৰীত মিত্ৰদল বিজেপিৰে নিৰ্বাচনী মিত্ৰতা নোহোৱাৰ বিষয়টো লৈ সাংবাদিকে শুধা এক প্ৰশ্নত কিছু অস্তত্বিত পৰা দেখা যায় অগপৰ সাধাৰণ সম্পাদকগৰাকীয়ে আৰু পৌৰসভা নিৰ্বাচনত মিত্ৰতা কৰা–নকৰাৰ বিষয়টোৰ সিদ্ধান্ত জিলা নেতৃত্বৰ ওপৰত এৰি দিয়া হৈছিল বুলি মন্তব্য কৰে। সাংবাদিকৰ এক প্ৰশ্নৰ উত্তৰত অসমত এতিয়াও আঞ্চলিকতাৱাদ আছে বুলি দোহাৰে আৰু ৰাজ্যৰ সৰু সৰু বিভিন্ন আঞ্চলিক দলসমূহৰ সৈতে অগপৰ কথা–বতৰা থকা বুলি এক তাৎপৰ্যপূৰ্ণ্য মন্তব্যও কৰাও পোৱা অগপৰ প্ৰাক্তন কেবিনেট মন্ত্ৰীগৰাকীয়ে ।
প্ৰেৰক অমিতাভ চক্ৰৱৰ্তী