📌 প্ৰান্তিক আলোচনীৰ সম্পাদক প্ৰদীপ বৰুৱালৈ জীৱনজোৰা সাধনা বঁটা
নিয়মীয়া বাৰ্তা ডিজিটেল, ২১ নৱেম্বৰঃ “নিয়মীয়া বাৰ্তা”কাকতৰ কাৰ্যবাহী সম্পাদক অমল দাসলৈ আগবঢ়োৱা হৈছে “সংবাদ শিৰোমণি সন্মান”৷ যুৱ সাংবাদিক সন্থা, অসমৰ তৰফৰ পৰা বৃহস্পতিবাৰে এই কথা ঘোষণা কৰা হয়। সভাপতি চন্দন দাস আৰু সম্পাদক কাঞ্চনজ্যোতি গোহাঁয়ে “নিয়মীয়া বাৰ্তা’ক” জনোৱা মতে অসমৰ সাংবাদিকতাৰ ক্ষেত্ৰখনলৈ আগবঢ়োৱা বৰঙনিৰ বাবেই “নিয়মীয়া বাৰ্তা’ৰ কাৰ্যবাহী সম্পাদক অমল দাসলৈ এই সন্মান আগবঢ়োৱা হৈছে ৷ আগন্তুক বৰ্ষৰ ১০ ফ্ৰেব্ৰুৱাৰীত যুৱ সাংবাদিক সন্থা, অসমৰ সপ্তম বাৰ্ষিক প্ৰতিষ্ঠা দিৱসৰ দিনা অনুষ্ঠিত হ’বলগীয়া বিশেষ অনুষ্ঠানত এই সন্মান প্ৰদান কৰা হ’ব বুলি যু্ৱ সাংবাদিক সন্থাই সদৰী কৰিছে৷ ইফালে বিশিষ্ট সাহিত্যিক তথা “প্ৰান্তিক“ আলোচনীৰ সম্পাদক প্ৰদীপ বৰুৱালৈ আগবঢ়োৱা হৈছে “জীৱনজোৰা সাধনা বঁটা” ৷“প্ৰান্তিক”আলোচনীৰ জৰিয়তে অসমীয়া সাহিত্য জগতলৈ কেইবাদশকজুৰি আগবঢ়োৱা অনৱদ্য অৱদানৰ বাবেই বিশিষ্ট সাহিত্যিক গৰাকীলৈ এই বঁটা আগবঢ়োৱা হৈছে ৷আনহাতে তিনিচুকীয়া জিলাৰ বাৰেকুৰি হলৌ বান্দৰৰ জৰিয়তে গঢ়ি উঠা গ্ৰাম্য পৰ্যতন সন্দৰ্ভত বিভিন্ন সময়ত যুগুতোৱা বাতৰিৰ বাবে তিনিচুকীয়াৰ প্ৰতিদিন টাইম চেনেলৰ সাংবাদিক জিতুল দত্তলৈ “বৰ্ষশ্ৰেষ্ঠ গ্ৰাম্য পৰ্যতন সাংবাদিকতা বঁটা ”আৰু চলিত বৰ্ষত কেইবাটাও দুৰ্নীতি ভ্ৰষ্টাচাৰ,লুন্ঠন আৰু অপৰাধৰ হকে বাতৰি কৰি ৰাইজৰ লগতে চৰকাৰৰ দৃষ্টি আৰ্কষণ কৰিবলৈ সক্ষম হোৱা Nd24 চেনেলৰ সাংবাদিক বিমল ভূষণ মহন্তলৈ আগবঢ়োৱা হৈছে “বৰ্ষশ্ৰেষ্ঠ যুৱ সাংবাদিকতা সন্মান”৷ ১০ ফ্ৰেব্ৰুৱাৰীত অনুষ্ঠিত হ’বলগীয়া বিশেষ অনুষ্ঠানত বিশিষ্ট সাহিত্যিক প্ৰদীপ বৰুৱাৰ লগতে কেউগৰাকী সাংবাদিককে একোটাকৈ বঁটা সন্মান প্ৰদান কৰা হ’ব বুলি যুৱ সাংবাদিক সন্থা, অসমৰ সভাপতি সম্পাদকে এক বিজ্ঞপ্তিৰ জৰিয়তে জানিবলৈ দিয়ে ৷