🔹 জয়পুৰ চলচ্চিত্র মহোৎসৱত জিলিকিল ‘অনচুনী ছিখে’
বিশেষ বাৰ্তা, ১৯ জানুৱাৰী : জয়পুৰ আন্তর্জাতিক চলচ্চিত্র মহোৎসৱৰ আন্তঃৰাষ্ট্রীয় প্রতিযোগিতা শাখা ‘ৱর্ল্ডউড ইণ্টাৰনেচনেল পেনোৰামা’ত প্রদর্শিত হৈছে ড০ পার্থসাৰথি মহন্তৰ কাহিনী আৰু পৰিচালনাত নির্মিত চুটি ছবি ‘অনচুনী ছিখে’৷ চুটি ছবিখনৰ প্রযোজনা কৰিছে মীনা মহন্ত আৰু ইন্দ্রানী বৰুৱাই৷ যোৱা ১৭ জানুৱাৰীৰ পৰা আৰম্ভ হোৱা জয়পুৰ আন্তর্জাতিক চলচ্চিত্র মহোৎসৱত প্রদর্শিত ‘অনচুনী ছিখে’ চুটি ছবিখনৰ একমাত্র চৰিত্রটোত অভিনয় কৰিছে প্রসিদ্ধ অভিনেত্রী সীমা বিশ্বাসে৷ গৌৰৱৰ কথা যে মহোৎসৱৰ চুটি ছবি শাখাত অভিনেত্রীগৰাকীয়ে ‘শ্রেষ্ঠ অভিনেত্রী’ আৰু পৰিচালক ড০ পার্থসাৰথি মহন্তই শ্রেষ্ঠ পৰিচালকৰ সন্মান লাভ কৰিবলৈ সক্ষম হৈছে৷ এই মহোৎসৱৰ সামৰণি পৰিব অহা ২১ জানুৱাৰীত৷ উল্লেখ্য যে ১৭সংখ্যক এই চলচ্চিত্র মহোৎসৱত অভিলেখসংখ্যক ৮৮খন দেশৰ ২,৪০৮খন চলচ্চিত্র অন্তর্ভুক্ত হৈছে৷