নিয়মীয়া বাৰ্তা, ২২ ডিচেম্বৰঃ অসম লোকসেৱা আয়োগ (এপিএছচি)ৰ ২০১৮ বর্ষত অনুষ্ঠিত সংযুক্ত প্রতিযোগিতামূলক পৰীক্ষাৰ ৫৪১গৰাকী প্রার্থীৰ ফলাফল সোমবাৰে বন্ধ খামত দাখিল কৰা হয় গুৱাহাটী উচ্চ ন্যায়ালয়ত৷
চূড়ান্ত ফলাফল ঘোষণাৰ বাবে অনুমতি বিচাৰি দাখিল কৰা আবেদনৰ শুনানি গ্রহণ কৰি উচ্চ ন্যায়ালয়ে এই ফলাফল দাখিল কৰিবলৈ নির্দেশ দিছিল৷ আজি এই গোচৰটোৰ শুনানি গ্রহণ কৰি ৰায়দান কৰাৰ সম্ভাৱনা আছে উচ্চ ন্যায়ালয়ে৷ এই পৰীক্ষাৰ চূড়ান্ত ফলাফল ঘোষণাৰ বিৰোধিতাৰে দাখিল কৰা আন একাংশ প্রার্থীৰ আবেদনৰ শুনানি আজি গ্রহণ কৰিব উচ্চ ন্যায়ালয়ে৷
উল্লেখ্য যে ২০১৮ চনত অনুষ্ঠিত সংযুক্ত প্রতিযোগিতামূলক লিখিত পৰীক্ষাত ভুল এনছাৰ কী অন্তর্ভুক্ত হোৱাক লৈ তীব্র প্রতিক্রিয়াৰ সৃষ্টি হৈছে৷ ইয়াৰ ফলত একাংশ প্রার্থী বঞ্চিত হোৱাৰো অভিযোগ উত্থাপিত হৈছে৷
আনহাতে, আন একাংশ প্রার্থীয়ে ভুল এনছাৰ কীৰ জৰিয়তে লিখিত পৰীক্ষাত উত্তীর্ণ হোৱাৰ তথ্য পোহৰলৈ আহিছে৷ ইয়াৰ পিছতে এই সমগ্র বিষয়টো গুৱাহাটী উচ্চ ন্যায়ালয়ৰ মজিয়া পায়৷ পূর্বে শুনানি গ্রহণ কৰি ন্যায়ালয়ে আয়োগক মূল লিখিত পৰীক্ষাৰ ফলাফল ঘোষণা কৰাৰ লগতে মৌখিক সাক্ষাৎকাৰ অনুষ্ঠিত কৰিবলৈ অনুমতি প্রদান কৰিছিল৷