নিয়মীয়া বাৰ্তা, ২০ জুলাইঃ মুখ্যমন্ত্ৰী ড৹ হিমন্ত বিশ্ব শৰ্মাই কঠোৰ জুৱা বিৰোধী স্থিতি লোৱা সত্বেও ধুবুৰীকে ধৰি জিলাখনৰ প্ৰান্তে প্ৰান্তে তীৰ নামৰ এবিধ জুৱাৰ ব্যাপক প্ৰচলন ঘটাৰ অভিযোগ উত্থাপিত হৈছে। উল্লেখ্য যে, মুখ্যমন্ত্ৰী ড৹ শৰ্মাৰ কঠোৰ নিৰ্দেশৰ পিছত বিগত বৰ্ষৰ ৯ জানুৱাৰীৰ নিশা সমগ্ৰ ৰাজ্যৰ ল’গতে ধুবুৰীতো চলিছিল আৰক্ষীৰ তীৰ বিৰোধী এক অভিযান। সেই অভিযানত ধুবুৰীকে ধৰি সমগ্ৰ জিলাখনৰ পৰা তীৰৰ জুৱাৰ সৈতে জড়িত ২২ গৰাকীকৈ ব্যক্তিক গ্ৰেপ্তাৰ কৰিছিল আৰক্ষীয়ে। আৰক্ষীৰ সেই অভিযানৰ পিছত ধুবুৰীত প্ৰায় এমাহ–ডেৰমাহমান তীৰৰ জুৱা সম্পূৰ্ণৰূপে বন্ধ আছিল। কিন্ত সময় বাগৰাৰৰ ল’গে ল’গে ধুবুৰীকে ধৰি জিলাখনৰ বিভিন্ন প্ৰান্তত পুনৰ আৰম্ভ হোৱা তীৰ নামৰ জুৱাবিধৰ বৰ্তমানে ব্যাপক ৰূপে প্ৰচলন ঘটা বুলিয়েই কিন্তু চৰ্চিত হ’বলৈ লোৱা পোৱা গৈছে। উল্লেখ্য যে, ৮০ৰ দশকৰ পৰা ধুবুৰীত আৰম্ভ হোৱা এই বিধ জুৱা পিছলৈ গৈ জিলাখনৰ প্ৰান্তে প্ৰান্তে বিয়পি পৰিছিল। প্ৰথমাৱস্থাত গুৱাহাটীৰ খানাপাৰাৰ সমীপৰ মেঘালয়ৰ এটা অঞ্চলৰ পৰা নিয়ন্ত্ৰিত হোৱা “খানাপাৰা তীৰ” বুলি জুৱাৰীসকলৰ মাজত পৰিচিত তীৰৰ জুৱাবিধৰ প্ৰচলন ঘটিছিল। পিছলৈ গৈ মেঘালয়ৰ পৰা নিয়ন্ত্ৰিত হোৱা ‘‘শ্বিলং তীৰ’’ নামৰ আন এবিধ তীৰৰ জুৱাও আৰম্ভ হৈছিল ধুবুৰীত। জানিব পৰা মতে, ২০২২ বৰ্ষত চলা আৰক্ষীৰ অভিযানৰ পিছত ধুবুৰী চহৰত পূৰ্বৰ তীৰৰ মূল পৃষ্ঠপোষক কেইগৰাকীৰ অধিকাংশৰে বৰ্তমানে তীৰৰ জুৱাৰ সৈতে সম্পৰ্ক নাই। অৱশ্যে এক ভিতৰুৱা সূত্ৰই সদৰি কৰানুসৰি, দীৰ্ঘ বহু বছৰৰ পৰাই তীৰসহ বিভিন্ন ধৰণৰ জুৱাৰ এগৰাকী পৃষ্ঠপোষক তথা ব্যৱসায়ী এগৰাকীয়ে বৰ্তমানে চহৰখনৰ তীৰৰ জুৱাৰ মূল পাণ্ডাৰূপে উঠি অহাৰ সমান্তৰালকৈ নতুন নতুন কেইবাগৰাকী লোকো তীৰৰ জুৱাৰ স্থানীয় জগতখনৰ স্বয়ম্ভু মালিকৰূপে জড়িত হৈ পৰিছে। সূত্ৰটোৱে আৰু সদৰি কৰানুসৰি, চহৰখনৰ প্ৰতিটো ৱাৰ্ডতে তীৰৰ স্থানীয় সেই স্বয়ম্ভূ মালিকসকলৰ আছে অতি কমেও আছে ৫/৬ গৰাকী কৈ গৰাকীকৈ বুকি অৰ্থাৎ তীৰৰ টিকট বিক্ৰেতা। আনহাতে, খানাপাৰা আৰু শ্বিলং –এই দুবিধ তীৰৰ জুৱাৰে আছে দুটাকৈ ৰাউণ্ড। প্ৰথম ৰাউণ্ডৰ ফলাফল বিয়লি ৪টা মানত উপলব্ধ হোৱাৰ বিপৰীতে বিয়লি ৫টাৰ ওচৰে পাজৰে পোৱা যায় দ্বিতীয় ৰাউণ্ডৰ ফলাফল। তীৰৰ জুৱাৰীসকলে দুয়ো ৰাউণ্ডতেই ০ (শূন্য) পৰা ৯৯ সংখ্যাৰ মাজৰ নিজৰ পছন্দ অনুসৰি সংখ্যাত ধন বিনিয়োগ কৰে। প্ৰতিটো ৰাউণ্ডতে ফলাফল ৰূপে অহা নম্বৰটো থাকিলে জুৱাৰী এজনে এটকাৰ বিনিময়ত লাভ কৰে ৭২ টকা। বুকী এজনে উকা কাগজৰ সৰু বহী এখনৰ পাতত তীৰৰ ৰাউণ্ড নম্বৰ, প্ৰতিটো ৰাউণ্ডত পছন্দৰ সংখ্যা আৰু সেই সংখ্যাবোৰৰ বিপৰীতে বিনিয়োগ কৰা কৰা ধনৰ পৰিমাণ লিখি প্ৰদান কৰে জুৱাৰীক। হোৱাটচ আপ আৰু মোবাইল যোগেও বুকিসকলে দিয়ে জুৱাৰীয়ে বিচৰা তীৰৰ নম্বৰ।জুৱাৰীক তীৰৰ নম্বৰ বিক্ৰী কৰি সংগ্ৰহ কৰা ধন প্ৰতিদিন বিয়লিৰ ফালে নিজৰ নিজৰ মালিকৰ হাতত জমা দিব লাগে বুকী এজনে আৰু ইয়াৰ বিনিময়ত বুকী এজনে দৈনিক জুৱাৰীক বিক্ৰী কৰা ধনৰ ২০ শতাংশ ধন কমিচন হিচাবে লাভ কৰে। এইদৰে মাথো ১ টকাৰ বিনিময়ত ৭২ টকা পোৱাৰ আশাত বন্দী হৈ বহু লোকে তীৰৰ নামত দৈনিক খৰচ কৰে বহু টকা। তীৰেৰে ধন ঘটাৰ এক অলীক সপোনৰ পিছে পিছে দৌৰি একাংশ চৰকাৰী চাকৰিয়ালকে ধৰি দিন হাজিৰা কৰি কোনোমতে নিজৰ পৰিয়ালক পোহপাল দিয়া বহুলোকে নিজৰ কষ্টোপাৰ্জিত ধনৰ এটা বৃহৎ অংশ নষ্ট কৰে তীৰৰ জুুৱাত। তাৰেই প্ৰেক্ষাপটত, ধুবুৰীৰ তীৰৰ মূল পাণ্ডা কেইগৰাকীক কৰায়ত্ত কৰি এই জুৱাবিধ সম্পূৰ্ণৰূপে উৎখাত কৰাৰ বাবে দীৰ্ঘ বহু বছৰৰ পৰাই ধুবুৰীৰ সচেতন মহলে উচ্চাৰিত কৰি আহিছে। কিন্তু দিঠকত গৈ মাজে সময়ে কেইগৰাকীমান স্থানীয় তীৰৰ বুকীক কৰায়ত্ব কৰি আৰক্ষীয়ে দায়িত্ব সামৰা হে প্ৰত্যক্ষিত কৰিছে ৰাইজে। ফলত স্বাভাৱিক ভাবেই ধুবুৰীকে ধৰি জিলাখনৰ বিভিন্ন প্ৰান্তৰ তীৰৰ মূল পৃষ্ঠপোষক কেইগৰাকীৰ সৈতে আৰক্ষীৰ এটা মহলৰ গোপন মিতিৰালী আছে নেকি বুলি জনমানসত এক প্ৰশ্নৰ জন্ম দিয়াও পোৱা গৈছে।
প্ৰেৰক অমিতাভ চক্ৰৱৰ্তী