হায় জনপ্রতিনিধি অসমৰ ২১ বিধায়ক মেট্রিক উত্তীৰ্ণ

নিয়মীয়া বাৰ্তা ২৩ ফেব্ৰুৱাৰীঃ অসম বিধানসভাৰ ১১৯গৰাকী বিধায়কৰ ভিতৰত ৩৭ শতাংশ বিধায়ক পঞ্চমৰ পৰা দ্বাদশ শ্রেণী উত্তীর্ণ৷ আনহাতে, ৬২ শতাংশ বিধায়কৰ শিক্ষাগত অর্হতা স্নাতক বা ততোধিক৷ এছ’চিয়েচন ফৰ ডেম’ক্রেটিক ৰিফর্মে আজি প্রকাশ কৰা আছাম ইলেকচন ৱাট্চৰ প্রতিবেদনত এই তথ্য প্রকাশ পাইছে৷ প্রতিবেদনখনত প্রকাশ পোৱা তথ্য অনুসৰি, বিধানসভাত পঞ্চম শ্রেণী উত্তীর্ণ এগৰাকী বিধায়ক আছে৷ কংগ্রেছ দলৰ পৰা নির্বাচিত হোৱা জামালউদ্দিন আহমেদ সমগ্র বিধানসভাৰ ভিতৰত আটাইতকৈ কম শিক্ষাগত অর্হতা থকা বিধায়ক৷ অষ্টম শ্রেণী উত্তীর্ণ হোৱা বিধায়ক দুগৰাকী হ’ল দক্ষিণ কৰিমগঞ্জৰ আজিজ আহমেদ খান আৰু আলগাপুৰৰ নিজাম উদ্দিন চৌধুৰী৷ দুয়োগৰাকীয়ে এ আই ইউ ডি এফ দলৰ প্রতিনিধি৷ ২১গৰাকী বিধায়ক দশম শ্রেণী উত্তীর্ণ, ২০গৰাকী দ্বাদশ শ্রেণী উত্তীর্ণ, ৩৮গৰাকী স্নাতক উত্তীর্ণ, কাৰিকৰী স্নাতক ৯গৰাকী, ২৫গৰাকী স্নাতকোত্তৰ, ২গৰাকী ডক্টৰেট আৰু ১গৰাকী ডিপ্ল’মাধাৰী৷ দল হিচাপত এ আই ইউ ডি এফৰ ১৪গৰাকীৰ ভিতৰত ৬গৰাকী, বিজেপিৰ ৫৯গৰাকীৰ ভিতৰত ২৪গৰাকী, কংগ্রেছৰ ২০গৰাকীৰ ভিতৰত ৭গৰাকী, বিপিএফৰ ১২গৰাকীৰ ভিতৰত ৪গৰাকী আৰু অগপৰ ১৩গৰাকীৰ ভিতৰত ২গৰাকীৰ শিক্ষাগত অর্হতা পঞ্চমৰ পৰা দ্বাদশ শ্রেণী উত্তীর্ণ৷ আনহাতে, পি এইচ ডি লাভ কৰা জনপ্রতিনিধি দুগৰাকী হ’ল জনিয়াৰ এ আই ইউ ডি এফৰ বিধায়ক ৰফিকুল ইছলাম আৰু জালুকবাৰীৰ বিজেপি বিধায়ক হিমন্ত বিশ্ব শর্মা৷