বিশেষ বাৰ্তা, ২ মাৰ্চ : সকলো জল্পনা-কল্পনাৰ অন্ত পেলাই লোকসভা নিৰ্বাচন-২০২৪ৰ বাবে অসমৰ ১১খন আসনৰ প্ৰাৰ্থী তালিকা ঘোষণা কৰিলে বিজেপিৰ ৰাষ্ট্ৰীয় নেতৃত্বই। ইতিপূৰ্বে অসমৰ ১৪খন আসনৰ ৩খন আসন মিত্ৰজোঁটৰ অংশীদাৰ দলক এৰি দিয়াৰ বিষয়ে বিজেপি নেতৃত্বই জানিবলৈ দিছে। উক্ত ৩খন আসনৰ অগপক দুখন আৰু ইউপিপিএলক ১খন আসন এৰি দিয়ে বিজেপিয়ে। বাকী থকা ১১খন আসনৰ প্ৰাৰ্থী তালিকা আজি সন্ধিয়া দিল্লীত আয়োজিত সংবাদ মেলত ঘোষণা কৰে বিজেপিৰ ৰাষ্ট্ৰীয় নেতৃত্বই। সংবাদ মেলত লোকসভা নিৰ্বাচন-২০২৪ৰ বাবে ঘোষণা কৰা অসম বিজেপিৰ প্ৰাৰ্থী তালিকাখন এনেধৰণৰ- কৰিমগঞ্জ- কৃপানাথ মাল্লা, শিলচৰ- পৰিমল শুক্লবৈদ্য, ডিফু- অমৰছিং তিছ’, গুৱাহাটী- বিজুলী কলিতা মেধি, কাজিৰঙা- কামাখ্যা প্ৰসাদ তাছা, দৰং ওদালগুৰি- দিলীপ শইকীয়া, শোণিতপুৰ- ৰঞ্জিত দত্ত, যোৰহাট- তপন গগৈ, ডিব্ৰুগড়- সৰ্বানন্দ সোণোৱাল, লখিমপুৰ- প্ৰদান বৰুৱা, নগাঁও- সুৰেশ বৰা।