নিয়মীয়া বাৰ্তা ৩০ অক্টোবৰঃ প্রতিদিনে বৃদ্ধি হৈ থকা পেট্র’ল–ডিজেলৰ মূল্যই ৰাজ্যবাসীক দিশহাৰা কৰাৰ সময়তে অচিৰেই ইন্ধনজাত সামগ্রীৰ মূল্য হ্রাস হ’ব বুলি আশা প্রকাশ কৰিছে মুখ্যমন্ত্রী ড০ হিমন্ত বিশ্ব শর্মাই৷ শুকুৰবাৰে এখন সংবাদ মেলত মুখ্যমন্ত্রীগৰাকীয়ে কয়– অসমত এতিয়াও পেট্র’ল–ডিজেলৰ মূল্য কম৷ কিয়নো ৰাজ্য চৰকাৰে পেট্র’ল–ডিজেলৰ ওপৰত পাঁচ শতাংশ মূল্য সংযোজিত কৰ (ভেট) উঠাই লৈছে৷ কেন্দ্রীয় পেট্র’লিয়াম মন্ত্রালয়ে দাম হ্রাস কৰাৰ ক্ষেত্রত পদক্ষেপ গ্রহণ কৰি আছে৷ আমি আশাবাদী, ৰাইজে অচিৰেই সকাহ পাব৷ এইক্ষেত্রত যদি ৰাজ্য চৰকাৰে বিশেষ পদক্ষেপ গ্রহণ কৰিব লাগে, সেই পদক্ষেপ গ্রহণ কৰিব৷
আমাক এক্সট্রা টেক্স নালাগে৷ চৰকাৰে পেট্র’ল–ডিজেলৰ কৰৰ জৰিয়তে বছৰি যি কৰ সংগ্রহৰ লক্ষ্য বান্ধি লৈছে, সেয়া পূৰণ হ’লে অতিৰিক্ত কৰ আমি সংগ্রহ নকৰোঁ৷ তেওঁ ইয়াকো উল্লেখ কৰে যে পেট্র’লৰ ঊর্ধ্বমুখী দামৰ প্রতি লক্ষ্য ৰাখি চৰকাৰে ইথানল প্রজেক্ট আৰম্ভ কৰাৰ প্রস্তুতি চলাইছে৷ ইতিমধ্যে ৭টা প্রতিষ্ঠানে ইথানল প্রস্তুতৰ বাবে বিনিয়োগ কৰিবলৈ সন্মত হৈছে৷ ৰাজ্যত ইথানল প্রস্তুতৰ কাম আৰম্ভ হ’লে পেট্র’লৰ সৈতে ফেৰ মাৰিব পৰাকৈ ইন্ধন লাভ কৰিব সাধাৰণ ৰাইজে৷