নিয়মীয়া বাৰ্তা, ১৭ জুলাইঃ বিধানসভাত শুকুৰবাৰে বিত্তমন্ত্রী অজন্তা নেওগে ২০২১–২২ বর্ষৰ বাবে দাখিল কৰা বাজেটৰ পাছতেই প্রতিক্রিয়া প্রকাশ কৰিলে শিৱসাগৰৰ বিধায়ক অখিল গগৈয়ে৷ বাজেটক লৈ মুখ্যমন্ত্রী ড০ হিমন্ত বিশ্ব শর্মাক ধন্যবাদ জ্ঞাপন কৰি অখিল গগৈয়ে কয়– উন্নয়নৰ কাম–কাজ সকলো বাজেটতে থাকে৷ কিন্তু আজি দাখিল কৰা বাজেটত মাটিৰ পট্টা আৰু ভূমিৰ অধিকাৰৰ কথা কোৱা হৈছে৷ ইয়াৰ বাবে মোৰ ভাল লাগিছে৷ গুৱাহাটী মহানগৰীৰ পাহাৰত বসবাস কৰা লোকসকলক আৰু বনাঞ্চলত থকা লোকসকলক পট্টা দিয়াৰ কথা আজি বাজেট ভাষণৰ মাজতে মুখ্যমন্ত্রীয়ে থিয় হৈ উল্লেখ কৰিছে৷ শিৱসাগৰ সমষ্টিৰ বাবে কেইবাটাও কাম হাতত লোৱাৰ কথা বাজেটত ঘোষণা কৰা হৈছে৷ ইয়াৰ বাবে মুখ্যমন্ত্রী ড০ হিমন্ত বিশ্ব শর্মা আৰু বিত্তমন্ত্রী অজন্তা নেওগক ধন্যবাদ জ্ঞাপন কৰিছে৷ কিন্তু শিৱসাগৰৰ উন্নয়নৰ বাবে ১০০ কোটি টকা বিচৰাৰ বিষয়টো উত্থাপন নহ’ল৷ সেইদৰে ক’ভিড আৰু লকডাউনৰ প্রভাৱৰ পৰা সাধাৰণ লোকক সকাহ দিয়াৰ বাবে এই বাজেটত একো নাই৷ বাজেটখনে কাকো সন্তুষ্ট কৰিব পৰা নাই, এখন বেদনাদায়ক আৰু হতাশাজনক বাজেট৷