নিয়মীয়া বাৰ্তা, ৯ ডিচেম্বৰঃ বি টি আৰৰ দ্বিতীয় পৰ্যায়ৰ নিৰ্বাচনৰ প্ৰাকমুহূৰ্তত সংঘটিত হ’ল হিংসাত্মক ঘটনা। ইউ পি পি এলৰ সভাপতি প্ৰমোদ বড়োৰ ওপৰত সংঘটিত হয় আক্ৰমণৰ ঘটনা। দুৰ্বৃত্তৰ আক্ৰমণৰ পৰা বড়োৰ কথমপি প্ৰাণ ৰক্ষা পৰে যদিও এই আক্ৰমণে দ্বিতীয় পৰ্যায়ৰ নিৰ্বাচনক লৈ নমাই আনিছে আশংকাজনক পৰিস্থিতিৰ সম্ভাৱনা।
ঘটনাৰ বিৱৰণী মতে, কোকৰাঝাৰৰ নয়গাঁৱত আজি প্ৰমোদ বড়োৰ কনভয়ত আক্ৰমণ কৰে দুৰ্বৃত্তই। আক্ৰমণ ইমানেই চৰম আছিল যে বড়োৰ বুলেট প্ৰুফ গাড়ীখনৰ ব্যাপক ক্ষতি হোৱাৰ লগতে আন ৪খন বাহনো ক্ষতিগ্ৰস্ত হয়। চোকা অস্ত্ৰ, ৰড-লাঠীৰে চলোৱা আক্ৰমণত প্ৰমোদ বড়োৰ কোনো বিশেষ ক্ষতি হোৱা নাই যদিও আহত হৈছে তেওঁৰ সমৰ্থক।
হঠাতে আক্ৰমণ কৰি পলায়ন কৰা দুৰ্বৃত্তৰ বিৰুদ্ধে এজাহাৰ দাখিল কৰিবলৈ কোকৰাঝাৰ থানাত উপস্থিত হয় বড়ো। আক্ৰমণৰ লগত কোন জড়িত আছে সেয়া এই মুহূৰ্তত জানিব পৰা হোৱা নাই যদিও আৰক্ষীৰ তদন্তত সকলো ফাদিল হ’ব বুলি আশা ব্যক্ত কৰিছে বড়োৱে।