নিয়মীয়া বাৰ্তা, ২৬ মার্চঃ টকিঅ’ অলিম্পিকত পদক জয়েৰে দেশলৈ গৌৰৱ কঢ়িয়াই অনা অসম কন্যা লাভলীনা বৰগোহাঁইক ভাৰতীয় ক্রিকেট নিয়ন্ত্রণ ব’র্ডে আজি আই পি এলৰ উদ্বোধনী অনুষ্ঠানত সম্বর্ধনা জনায়৷ মুম্বাইৰ ৱাংখেড়ে ষ্টেডিয়ামত অনুষ্ঠিত ঐশ্বর্যশালী টি–২০ লীগ আই পি এলৰ উদ্বোধনী অনুষ্ঠানত লাভলীনাৰ লগতে টকি’ অলিম্পিকত স্বর্ণজয়ী তাৰকা জেভলিন থ্র’ৱাৰ নিৰজ চোপ্রাকো ব’র্ডে সন্মানিত কৰে৷ স্বর্ণজয়ী নিৰজক বি চি চি আইৰ সভাপতি সৌৰভ গাংগুলী আৰু সচিব জয় শ্বাহে এক কোটি টকাৰ পুৰস্কাৰ আগবঢ়ায়৷ একেদৰে ব্রঞ্জ বিজয়ী লাভলীনাক ২৫ লাখ টকাৰ চেক প্রদান কৰা হয়৷ এই অনুষ্ঠানত টকি’ অলিম্পিকত ব্রঞ্জজয়ী ভাৰতীয় পুৰুষ হকী দলটোকো সম্বর্ধনা জনোৱা হয়৷ মন কৰিবলগীয়া যে বি চি চি আয়ে টকি’ অলিম্পিকত সাফল্য অর্জন কৰা প্রতিগৰাকী খেলুৱৈক নগদ ধনেৰে পুৰস্কৃত কৰিব বুলি ইয়াৰ পূর্বে ঘোষণা কৰিছিল৷