নিয়মীয়া বাৰ্তা, ৮ আগষ্ট : নগৰবেৰাৰ অদলাত চাঞ্চল্যকৰ কাণ্ড। নিশা ৰাজপথত অচিনাক্ত দুৰ্বৃত্তৰ আক্ৰমণত এজন যুৱক গুৰুতৰভাৱে আহত হয় | নগৰবেৰাৰ পৰা বাইকৰ গেৰেজ বন্ধ কৰি ঘৰলৈ গৈ থকা অৱস্থাত দুৰ্বৃত্তৰ দলে বাট আগচি উপৰ্যুপৰি প্ৰহাৰ কৰি ৰাজপথতে পেলাই থৈ যায় দলাগাঁৱৰ এজন যুৱকক | দুৰ্বৃত্তৰ দলবদ্ধ আক্ৰমণত গুৰুতৰভাৱে আহত যুৱকজনৰ নাম অৰুণ দাস। নগৰবেৰাৰ নায়টৰ-কল্যাপুৰৰ খোলা ৰিজাৰ্ভ অঞ্চলত নিশা ৰাজপথত সংঘটিত হৈছে এই চাঞ্চল্যকৰ কাণ্ড | যুৱকজনে চিঞৰ-বাখৰ কৰাত গাঁৱৰ ৰাইজ ওলাই অহাত ৰাজপথতে যুৱকজনক পেলাই থৈ সেই স্থানৰ পৰা পলায়ন কৰে দুৰ্বৃত্তৰ দলটিৱে | ঘটনাটোক কেন্দ্ৰ কৰি নিশাৰ ভাগত তীব্ৰ চাঞ্চল্যৰ সৃষ্টি হয় অঞ্চলটোত। খবৰ পাই নগৰবেৰা আৰক্ষী থানাৰ ভাৰপ্ৰাপ্ত আৰক্ষী বিষয়া লাৱণ্য বড়োৰ নেতৃত্বত আৰক্ষীৰ দল এটা উপস্থিত হৈ পৰিস্থিতি নিয়ন্ত্ৰণ কৰাৰ লগতে অনুসন্ধান চলায় | গুৰুতৰভাৱে আহত হোৱা অৰুণ দাসক স্থানীয় ৰাইজে ততাতৈয়াকৈ প্ৰথমে টিপলাই ক্ষুদ্ৰ প্ৰাথমিক স্বাস্থ্যকেন্দ্ৰত ভৰ্তি কৰায় যদিও অৱস্থা সংকটজনক হোৱাত তাৰ পৰা ৰংজুলি চিকিৎসালয়ত আৰু পাছলৈ ৰংজুলিৰ পৰা ৰেফাৰ কৰা হয় গোৱালপাৰা অসামৰিক চিকিৎসালয়লৈ |
প্ৰেৰক সঞ্জীৱ কুমাৰ দাস