বিশেষ বাৰ্তা, ৩১ মাৰ্চঃ নলবাৰী চহৰৰ চ’ক বজাৰ সমীপৰ সোণেৰীপাৰাত আজি পুৱা এখন যাত্ৰীবাহী ট্ৰেভেলাৰৰ কৰ্মচাৰীয়ে বাইক আৰোহীএজন যুৱকক মাৰপিট কৰাক কেন্দ্ৰ কৰি উত্তপ্ত পৰিস্থিতিৰ সৃষ্টি কৰিছে। আজি পুৱা সংঘটিত হয় উক্ত উত্তপ্ত পৰিস্থিতিৰ ঘটনাটি।ঘটনাৰ বিবৰণি অনুসৰি, এএছ ২৫ ডি চি ৯২০৯ নম্বৰৰ ট্ৰেভেলাৰ খনে নলবাৰী চহৰৰ পৰা হাজো পথ হৈ গুৱাহাটী অভিমুখে গৈ থকা অৱস্থাত বাইকত আহি থকা এগৰাকী যুৱক সহ মহিলাৰ লগত তৰ্ক যুদ্ধত লিপ্ত হয় ট্ৰেভেলাৰখনৰ কৰ্মচাৰী এজনে।ইয়াৰ মাজতে ট্ৰেভেলাৰৰ কৰ্মচাৰীজনে বাইক আৰোহী যুৱক জনক গাড়ীৰ পৰা লোহাৰ সজুলি উলিয়াই আনি যুৱকজনক ভৰিত কোবাই আঘাতপ্ৰাপ্ত কৰাৰ পিছতেই সমগ্ৰ অঞ্চলটোতেই হুলস্থলীয়া পৰিবেশৰ সৃষ্টি হয়।এই ঘটনাৰ ক্ষন্তেক পিছতেই যুৱক জন সহিতে স্থানীয় কেইগৰাকীমান লোকে ট্ৰেভেলাৰ খন খেদি খেদি চ’ক বজাৰৰ নিচেই সমীপৰ সোণেৰীপাৰাত আগুৰি ধৰে। তাৰ পিছতেই উক্ত স্থানত এক উত্তপ্ত পৰিস্থিতিৰ সৃষ্টি হয়। তৰ্ক যুদ্ধত লিপ্ত হয় ট্ৰেভেলাৰৰ চালক-কৰ্মচাৰী সহিতে স্থানীয় ৰাইজ। পিছত ঘটনাস্থলীত নলবাৰী সদৰ থানাৰ যান-বাহন শাখাৰ ভাৰপ্ৰাপ্ত বিষয়া নিকুৰাজা চিত্ৰকৰৰ নেতৃত্বত এটি আৰক্ষীৰ দল উপস্থিত হৈ পৰিস্থিতি নিয়ন্ত্ৰণ কৰাৰ লগতে ট্ৰেভেলাৰ সহিতে চালক-কৰ্মচাৰীক নলবাৰী সদৰ থানালৈ লৈ আহে। লগতে আৰক্ষীয়ে আঘাতপ্ৰাপ্ত যুৱক জনক চিকিৎসালয়লৈ প্ৰেৰণ কৰে।
প্ৰেৰক অৰূপ ৰঞ্জন বৰ্মন