🔹 মোদীময় অসম
🔹 ‘এইবাৰ নির্বাচনত সকলো মুছলমান মা–ভনীয়ে প্রধানমন্ত্রী নৰেন্দ্র মোদীকে ভোট দিব’
বিশেষ বাৰ্তা, ১৪ মার্চ : আসন্ন লোকসভা নির্বাচনত অসমত বিজেপি মিত্রজোঁটে ১৩খন আসনত জয়ী হ’ব৷ এই মন্তব্য মুখ্যমন্ত্রী ড০ হিমন্ত বিশ্ব শর্মাৰ৷ আজি দিছপুৰৰ জনতা ভৱনস্থিত লোকসেৱা ভৱনত আয়োজিত এখন সংবাদ মেলত মুখ্যমন্ত্রী ড০ শর্মাই কয় যে ধুবুৰীৰ আসনখনৰ বাহিৰে আটাইকেইখনতে বিজেপি মিত্রজোঁট জয়ী হ’ব৷ ধুবুৰীত বিজেপি মিত্রজোঁট জয়ী নহয়৷ তাত নোৱাৰোঁ৷ ধুবুৰীত জয়ী হ’ব লাগিলে মই ইমান দিনৰ আদর্শৰ পৰা চ্যুত হ’ব লাগিব৷ অৱশ্যে এইবাৰ ধুবুৰী লোকসভাত বিজেপি জয়ী নহ’লেও অহা বিধানসভা নির্বাচনত জিলাখনৰ ৪টা সমষ্টিত বিজেপিৰ বিধায়ক জয়ী হ’ব৷ লোকসভা নির্বাচনত মুখ্যমন্ত্রী ড০ শর্মাই ধুবুৰীত প্রচাৰ চলাবলৈও নাযায় বুলি স্পষ্ট কৰি দিয়ে৷ আনহাতে, এইবাৰ নির্বাচনত সকলো মুছলমান মা–ভনীয়ে প্রধানমন্ত্রী নৰেন্দ্র মোদীকে ভোট দিব বুলি উল্লেখ কৰি মুখ্যমন্ত্রী ড০ শর্মাই কয় যে এইবাৰৰ নির্বাচন নৰেন্দ্র মোদীক তৃতীয়বাৰৰ বাবে দেশৰ প্রধানমন্ত্রী কৰাৰ নির্বাচন৷ বাৰাণসীত মোদীৰ লগত বলীউডৰ কোনো তাৰকা আহি প্রতিদ্বন্দ্বিতা কৰিলেও জয়ী হ’ব নোৱাৰে৷ নগাঁও লোকসভাৰ আসনখনত কংগ্রেছে দুর্বল প্রার্থী থিয় কৰাই ছুইচাইড কৰি দিলে বুলি মন্তব্য কৰি মুখ্যমন্ত্রী ড০ শর্মাই কয় যে নগাঁৱৰ কংগ্রেছ প্রার্থীগৰাকীৰ লগত ২০–২২জন লোকেহে ঘূৰি আছে৷ যোৰহাট লোকসভাৰ আসনখনত তীব্র যুঁজ হ’ব বুলি সংবাদ মাধ্যমেহে কৈ থকাৰ উল্লেখ কৰি মুখ্যমন্ত্রী ড০ শর্মাই কয় যে যোৰহাটত প্রধানমন্ত্রী নৰেন্দ্র মোদী অহাত যি জনসমাগম হৈছে, তাৰ পৰাই স্পষ্ট হৈছে যোৰহাট-শিৱসাগৰৰ মানুহে নৰেন্দ্র মোদীকেই প্রধানমন্ত্রী বনাব৷ কালি ৰাজীৱ ভৱনত সমষ্টিটোৰ কংগ্রেছ প্রার্থী গৌৰৱ গগৈক আদৰিবলৈ ভাৰাতীয়া বিহুৱা-নাচনীৰ দল লৈ অহা বুলিও গুৰুতৰ অভিযোগ কৰে৷ ডিব্রুগড়ৰ আসনখনৰ ক্ষেত্রত সর্বানন্দ সোণোৱালক ইতিমধ্যে ৱাক অভাৰ দিয়া বুলি মন্তব্য কৰি মুখ্যমন্ত্রী ড০ শর্মাই কয় যে সোণোৱালে তিনি লাখৰো অধিক ভোটৰ ব্যৱধানত জয়লাভ কৰিব৷ সমগ্র অসম এতিয়া মোদীময়৷ মানুহৰ মন–মগজুত এতিয়া কেৱল নৰেন্দ্র মোদী৷