বিশেষ বাৰ্তা, ৬ মাৰ্চঃ মুখ্যমন্ত্ৰী ড° হিমন্ত বিশ্বশৰ্মা আজি উত্তৰ অসমৰ নাৰায়ণপুৰ আৰু উত্তৰ লখিমপুৰ ভ্ৰমণ কৰি বহকেইটা জনকল্যাণমুখী আচঁনি উন্মোচন কৰি ৰাইজক সম্বোধন ধৰে৷ মুখ্যমন্ত্ৰীগৰাকীয়ে উত্তৰ অসম ভ্ৰমণৰ সময়ত নৱগঠিত ৭৪নং ৰঙানদী বিধানসভা সমষ্টিৰ বিজেপিৰ যুৱনেতা ঋষিৰাজ হাজৰিকাৰ নেতৃত্বত তিনি সহস্ৰাধিক মটৰচাইকেল ৰেলীৰে ৰঙানদী সমষ্টিৰ পৰা লখিমপুৰৰ চকলিভৰিয়াত উপস্থিত হৈ মুখ্যমন্ত্ৰীগৰাকীৰ জনসভাত অংশগ্ৰহণ কৰে৷ লালুকৰ পৰা আৰম্ভ কৰা মটৰচাইকেল ৰেলীটোত হাজাৰ হাজাৰ লোকে অংশগ্ৰহণ কৰি চমক সৃষ্টি কৰাৰ লগতে সমষ্টিটোত বিৰোধীক একপ্ৰকাৰে নস্যাৎ কৰে৷ বিশাল মটৰচাইকেল ৰেলীটোৱে সকলোৰে দৃষ্টি আকৰ্ষণ কৰিবলৈ সক্ষম হয়৷ মটৰচাইকেল ৰেলীটো আজি পুৱা প্ৰায় ১০.৩০ বজাত লালুকৰ পৰা ১৫নং ৰাষ্ট্ৰীয় ঘাইপথৰে প্ৰায় পঁচিশ কিলোমিটাৰ গৈ মুখ্যমন্ত্ৰীৰ জনসভাত উপস্থিত হয়৷ নতুনকৈ গঠন হোৱা সমষ্টিটোত বিজেপিৰ আজি উলিওৱা মটৰচাইকেল ৰেলীটোৱে সমষ্টিটোত বিজেপিৰ স্থিতি যে অতি মজবুত তাকে প্ৰতিপন্ন কৰে বুলি সমষ্টিটোৰ সচেতন নাগৰিকে মন্তব্য কৰিছে৷ উল্লেখযোগ্য যে বিজেপিৰ যুৱনেতা ঋষিৰাজ হাজৰিকাই দীৰ্ঘ দিন ধৰি সমষ্টিটোত বহু জনকল্যাণমুখী কামৰ জৰিয়তে ৰাইজৰ সেৱা কৰি আহিছে৷ কংগ্ৰেছৰ দখলত থকা বৰ্তমানৰ নাওবৈচা সমষ্টিটো ইয়াৰ পুৰ্বৰ কাৰ্যকালটো এ আই ইউ ডি এফৰ দখলত আছিল৷ বান, গৰাখহনীয়াকে আদি কৰি নানা সমস্যাৰে ভাৰাক্ৰান্ত সমষ্টিটো উন্নয়ন একেবাৰে স্থবিৰ হৈ ৰোৱা বুলি সমষ্টিটোৰ সচেতন মহলে মত পোষণ কৰিছে৷ সমষ্টি পুনৰ নিৰ্ধাৰণ প্ৰক্ৰিয়াত ৭৪নং ৰঙানদী সমষ্টি নামেৰে নতুনকৈ সমষ্টি সৃষ্টি হ’ল৷ ৰঙানদী সমষ্টিৰ এইগৰাকী যুৱ নেতাই সদায়ে ৰাইজৰ কাষত থাকি জনসেৱা আগবঢ়াই আহিছে৷ আজি বাহিৰ হোৱা মটৰচাইকেল ৰেলীটো সমষ্টিটোৰ পৰা বৰ্তমান পৰ্যন্ত বৃহৎ মটৰচাইকেল ৰেলী হিচাপে বিবেচিত হৈছে৷
প্ৰেৰক মৃদুল ফুকন