বিশেষ বাৰ্তা, ২৯ আগষ্ট : যোৰহাটৰ নৱনিৰ্মিত উৰণ সেতুৰ তলত আজি দিনৰ প্ৰায় ১১ বজাত এজন ব্যক্তিৰ মৃতদেহ উদ্ধাৰ হয়। মৃত ব্যক্তিজনৰ নাম বুবু দাস (৩৮) । যোৰহাটৰ বৰিগাঁৱৰ নিবাসী এই ব্যক্তিগৰাকীৰ প্ৰকৃত ঘৰ মাজুলীত। ব্যক্তিগৰাকীয়ে মাছৰ ব্যৱসায়ৰ লগতে অন্যান্য সৰু ব্যৱসায় কৰি পৰিয়াল চলাই আহিছিল। আজি পুৱা ৯ বজাত ব্যৱসায়িক কামত বুবু দাস ওলাই আহিছিল। উৰণ সেতুৰ সমীপৰ স্থানীয় ৰাইজে জনোৱা মতে, বুবু দাস নামৰ ব্যক্তিজনে লিচুবাৰী দিশৰ পৰা আহি উৰণ সেতুৰ তলত ৰে’লগেটৰ সমীপৰ বহি পৰে আৰু কিছু সময়ৰ পিছত উক্ত স্থানত ঢলি পৰে। এই ঘটনা সংঘটিত হোৱাৰ পিছত স্থানীয় ৰাইজে বুবু দাসৰ মৃত্যু হোৱা বুলি জানি আৰক্ষীক খবৰ দিয়াত আৰক্ষী উক্ত স্থানত উপস্থিত হৈ ব্যক্তিজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে যোৰহাট মেডিকেল কলেজলৈ প্ৰেৰণ কৰে। মৃত বুবু দাসে পত্নী আৰু এগৰাকী সাত বছৰীয়া কন্যাক এৰি গৈছে।
প্ৰেৰক ৰঞ্জিত ভূঞা