নিয়মীয়া বাৰ্তা, ১০ জুলাইঃ পঞ্চদশ অসম বিধানসভাৰ বাজেট অধিৱেশন অহা ১২ জুলাইৰ পৰা আৰম্ভ হ’ব৷ অধিৱেশনৰ অন্ত পৰিব অহা ১৩ আগষ্টত৷ আৰম্ভণিৰ দিনটোত মৃত্যু প্রসংগ আৰু প্রশ্ণৰ পাছতে অধ্যক্ষই বিধানসভাৰ ২০২১ চনৰ বাজেট অধিৱেশনৰ বাবে কার্যসূচী স্থিৰ কৰি কার্য উপদেষ্টা সমিতিৰ প্রতিবেদন ঘোষণা কৰিব৷ ইয়াৰ পাছত অধ্যক্ষই অসম বিধানসভাৰ প্রক্রিয়া আৰু কার্য পৰিচালনা নিয়মাৱলীৰ ৯ (১) নিয়মৰ অধীনত সদন পৰিচালনাৰ বাবে মনোনীত সভাপতিসকলৰ নাম ঘোষণা কৰিব৷
সেই দিনটোতে অন্যান্য কার্যসূচীৰ লগতে চৰকাৰী বিধেয়কসমূহ উপস্থাপন আৰু ২০২১–২২ চনৰ পৰিপূৰক দাবী আৰু পৰিপূৰক বিনিয়োজনসমূহৰ তালিকা উপস্থাপন কৰা হ’ব৷ ১৩ জুলাইত বেচৰকাৰী সদস্যৰ কার্যসূচী আৰু ১৪, ১৫ জুলাইত অধিৱেশনৰ চৰকাৰী কার্যসূচীসমূহ চলিব৷ ২০২১–২০২২ বর্ষৰ বার্ষিক বিত্তীয় প্রতিবেদন (প্রাক্কলিত বাজেট) উপস্থাপন কৰা হ’ব অহা ১৬ জুলাইত৷ অধিৱেশনৰ সময়ছোৱাত বন্ধ দিনসমূহৰ বাদে ২২ জুলাইৰ পৰা ৩ আগষ্টলৈ বিভাগীয়ভাৱে সম্পর্কিত স্থায়ী সমিতিসমূহৰ বৈঠকৰ বাবে জিৰণি থাকিব৷ ৬ আগষ্টৰ দিনা ২০২১ চনৰ অসম বিনিয়োজন (নং) বিধেয়কখনৰ উপস্থাপন, বিবেচনা আৰু পাৰিতকৰণ হ’ব৷
অধিৱেশনৰ পৰৱর্তী দিনসমূহত নির্দিষ্ট ক্রম অনুসৰি চৰকাৰী আৰু বেচৰকাৰী সদস্যৰ কার্যসূচী চলি থাকিব৷ ১২ আগষ্টৰ দিনা থাকিব অধ্যক্ষৰ উদ্যোগৰ কার্যসূচী৷ অধিৱেশনৰ অন্তিম দিন ১৩ আগষ্টত চৰকাৰী বিধেয়কসমূহ বিবেচনা, পাৰিতকৰণ আৰু অন্যান্য অসমাপ্ত চৰকাৰী কার্যসূচীৰ পাছত অধ্যক্ষই অনির্দিষ্টকালৰ বাবে স্থগিত ঘোষণা কৰাৰ লগে লগে এই বাজেট অধিৱেশনৰ অন্ত পৰিব৷