বিশেষ বাৰ্তা, ১৩ মেঃ ডিব্ৰুগড় চহৰৰ ৰাজপথত এক ভয়ংকৰ ঘটনা সংঘটিত হয়।চহৰখনৰ মানকটা পথত বিয়লি প্ৰায় ৫ বজাত জ্বলি উঠিল এখন বিলাসী গাড়ী।প্ৰত্যক্ষদৰ্শীৰ মতে এএচ ০১ একে ৬৬৯৬ নম্বৰৰ এখন স্কৰ্পিয় বাহন হঠাৎ জ্বলি উঠে।চহৰৰ মানকটা পথৰ ৰেলৱে অভাৰ ব্ৰীজ পাবলৈ প্ৰায় দুশ মিটাৰ পূৰ্বে এই ঘটনা সংঘটিত হয়। প্ৰথমে বাহনখনৰ পৰা ধোঁৱা ওলাই আৰু তাৰ পাছতে লগে লগে জ্বলি উঠিল বাহনখন। বাহনখন জ্বলি থকা অৱস্থাতে দুটাকৈ প্ৰবল বিস্ফোৰণো হয় বাহনখনত। ফলত অধিক তীব্রতৰ হৈ উঠে জুই আৰু জুইত সম্পূর্ণৰূপে ভস্মিভূত হয় বাহনখন। ইফালে এই ঘটনাত কথমপিহে প্ৰাণ ৰক্ষা পৰে ৪ জন লোকৰ। বাহনখন জকাইৰ বদন চন্দ্র দাসৰ আছিল বুলি জানিব পৰা গৈছে। বদন দাসে বাহন খন চলাই পত্নী, ভাতৃ আৰু ভাতৃৰ পত্নী সহ জকাইৰ পৰা আহি আছিল। জুই লগাৰ পূৰ্বে বাহনখনত প্ৰথমে ধোঁৱা নিৰ্গত হৈছিল। বাহনখনত থকা পৰিয়ালটোৱে ধোঁৱা দেখি ততাতৈয়াকৈ বাহনখনৰ পৰা নামি আঁতৰি যায় তেওঁলোক। ইফালে এই ঘটনাত কোনো লোক হতাহত হোৱা নাই যদিওঁ সৃষ্টি হয় এক আতংকময় পৰিস্থিতিৰ। ঘটনাস্থলীত অগ্নি নিৰ্বাপক বাহিনী, এছ ডি আৰ এফৰ জোৱান উপস্থিত হৈ গাড়ীখনত লগা জুই নিয়ন্ত্রণ কৰিবলৈ সক্ষম হয় যদিও গাড়ীখন প্ৰায় জ্বলি বিধস্ত হয়। আনহাতে বাহনখনৰ সমিপত ৰাখি থোৱা আন এখন বেলিন’ বাহন কিছু পৰিমাণে নষ্ট হোৱাৰ ওপৰিও সমিপৰে কেইবাখনো মটৰ বাইক সহ বাহন, গৃহ ইত্যাদি জুইৰ সংস্পৰ্শলৈ অহাৰ পৰা কথমপিহে ৰক্ষা পৰে।
প্ৰেৰক বিভাস দুৱৰা