লখিমপুৰত ৰেচন কাৰ্ড বিতৰণ
উপকৃত হল ১১,৯৮২টা পৰিয়ালৰ ৪৪,৮৭০জন হিতাধিকাৰী।
বিশেষ বাৰ্তা, ২৫ জানুৱাৰীঃ অসম চৰকাৰৰ খাদ্য, ৰাজহুৱা বিতৰণ আৰু গ্ৰাহক পৰিক্ৰমা বিভাগৰ উদ্যোগত আৰু লখিমপুৰ জিলা প্ৰশাসনৰ ব্যৱস্থাপনাত ৭৩নং বিহপুৰীয়া বিধানসভা সমষ্টিৰ বৰখামতী খেলপথাৰ, পাণবাৰী আৰু ৭৪নং ৰঙানদী সমষ্টিৰ ড°ভূপেন হাজৰিকা ৰংগমঞ্চত আজি কৃষিমন্ত্ৰী অতুল বৰাই ১১,৯৮২টা পৰিয়ালৰ ৪৪,৮৭০জন হিতাধিকাৰীক ৰেচন কাৰ্ড বিতৰণ কৰে। ৰাষ্ট্ৰীয় খাদ্য সুৰক্ষা আইন, ২০১৩ৰ অধীনত ৭৩নং বিহপুৰীয়া বিধানসভা সমষ্টি আৰু ৭৪নং ৰঙানদী বিধানসভা সমষ্টিত আনুষ্ঠানিকভাৱে নতুন ৰেচন কাৰ্ড বিতৰণ কাৰ্য্যসূচীত তেওঁ অংশগ্ৰহণ কৰে। 
উল্লেখ্য যে সমগ্ৰ ৰাজ্যখনতে খাদ্য, ৰাজহুৱা বিতৰণ আৰু গ্ৰাহক পৰিক্ৰমা বিভাগৰ অধীনত নতুনকৈ ৰেচন কাৰ্ড লাভ কৰা পৰিয়ালসমূহক যোৱা ১৬ জানুৱাৰীৰ পৰা ৰেচন কাৰ্ড প্ৰদান কৰি অহা হৈছে। ইয়াৰ অংশ হিচাপে লখিমপুৰৰ ৭৩নং বিহপুৰীয়া বিধানসভা সমষ্টি আৰু ৭৪নং ৰঙানদী বিধানসভা সমষ্টিত মন্ত্ৰী বৰাৰ উপস্থিতিত আয়োজিত অনুষ্ঠানত বিহপুৰীয়া বিধানসভাৰ ৪৯১২টা পৰিয়াললৈ আৰু ৰঙানদী বিধানসভাৰ ৭০৭০টা পৰিয়াললৈ নতুনকৈ ৰেচন কাৰ্ড প্ৰদান কৰা হয়। অনুষ্ঠানত মুখ্য অতিথি হিচাপে অংশ গ্ৰহণ কৰি মন্ত্ৰী বৰাই কয় যে ৰাষ্ট্ৰীয় খাদ্য সুৰক্ষা আইনৰ অধীনত চৰকাৰে সৰ্বসাধাৰণৰ ভোক আৰু পুষ্টিহীনতা নিবাৰণৰ দ্বাৰা দেশত সামাজিক ন্যায় প্ৰতিষ্ঠাৰ ক্ষেত্ৰত যথেষ্ট সফলতা লাভ কৰিছে। খাদ্য সুৰক্ষা আইনৰ অধীনত অন্ত্যোদয়া অন্ন যোজনা কাৰ্ড আৰু অগ্ৰাধিকাৰ প্ৰাপ্ত পৰিয়াল কাৰ্ডৰ জড়িয়তে পৰিয়ালে প্ৰতি মাহে ৩৫ কিলোগ্ৰামকৈ আৰু সদস্যই প্ৰতিমাহে ৫ কিলোগ্ৰামকৈও চাউল লাভ কৰে বুলি উল্লেখ কৰি মন্ত্ৰীগৰাকীয়ে কয় যে অসমত এই চাউল সম্পূৰ্ণ বিনামূলীয়াকৈ উপলব্ধ আৰু প্ৰতি মাহৰ ১০ তাৰিখৰ ভিতৰত এই চাউল হিতাধিকাৰীসকলে লাভ কৰে। আনহাতে ৰেচন কাৰ্ড লাভ কৰা পৰিয়ালসমূহে আয়ুষ্মান আঁচনিৰ অধীনত বছৰি ৫ লাখ টকা পৰ্যন্ত বিনামূলীয়া চিকিৎসা সেৱা আৰু উজ্জ্বলা আঁচনিৰ অধীনতো সুবিধা লাভ কৰিব পাৰিব বুলি মন্ত্ৰীগৰাকীয়ে উল্লেখ কৰে। প্ৰধানমন্ত্ৰী নৰেন্দ্ৰ মোদী আৰু অসমৰ মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত কেন্দ্ৰ আৰু ৰাজ্য চৰকাৰে সমাজৰ প্ৰতিজন ব্যক্তিৰে জনকল্যাণৰ বাবে আন্তৰিকতাৰে কাম কৰি আছে বুলি উল্লেখ কৰি মন্ত্ৰীগৰাকীয়ে সকলোকে চৰকাৰী আঁচনিৰ সুবিধাসমূহ গ্ৰহণ কৰিবলৈ আহ্বান জনায়। আনহাতে মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত চৰকাৰে সম্পূৰ্ণ প্ৰতিশ্ৰুতি অনুসৰি কাম কৰি আছে বুলি মন্তব্য কৰি তেখেতে কয় যে চৰকাৰে প্ৰতিশ্ৰুতি দিয়া অনুসৰি অৰুণোদয়, প্ৰধানমন্ত্ৰী আবাস যোজনা, মাইক্ৰ’ফাইনেন্স লোণ ৰেহাই আদি আঁচনিও সফলতাৰে কাৰ্যকৰী কৰিছে। আনহাতে মহিলা সৱলীকৰণৰ এক দৃঢ় পদক্ষেপ হিচাপে আত্মসহায়ক গোটৰ প্ৰতিগৰাকী সদস্যাক ১০,০০০ টকাকৈ দিয়াৰ ব্যৱস্থা কৰা হৈছে বুলিও মন্ত্ৰীগৰাকীয়ে উল্লেখ কৰে। প্ৰণিধানযোগ্য যে সমগ্ৰ ৰাজ্যখনত নতুনকৈ প্ৰায় ৪২,৮৫,৭৪৫ লাখ হিতাধিকাৰীয়ে ৰেচন কাৰ্ড লাভ কৰিবলৈ সক্ষম হৈছে। সভাত বিহপুৰীয়াৰ বিধায়ক ড°অমিয় কুমাৰ ভূঞাই কয় যে প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী ডঃ হিমন্ত বিশ্ব শৰ্মা নেতৃত্বাধীন কেন্দ্ৰীয় আৰু ৰাজ্য চৰকাৰখনে ৰাইজৰ কল্যাণৰ বাবে কাম কৰিবলৈ বদ্ধপৰিকৰ। তেওঁ চৰকাৰৰ বিভিন্ন জনকল্যাণমূলক আঁচনিৰ ওপৰত আলোকপাত কৰি কয় যে প্ৰতিখন আঁচনিয়ে দৰিদ্ৰ লোকসকলৰ কল্যাণ নিশ্চিত কৰিছে। তেওঁ সজাগতাৰ অভাৱত যাতে কোনো যোগ্য হিতাধিকাৰী ৰেচন কাৰ্ডৰ পৰা বঞ্চিত নহয় সেয়া সুনিশ্চিত কৰাৰ ওপৰত গুৰুত্ব আৰোপ কৰে। শৈক্ষিক ক্ষেত্ৰত বৰ্তমান চৰকাৰখনে এক যুগান্তকাৰী পৰিৱৰ্তন আনিছে বুলি তেওঁ উল্লেখ কৰে। লখিমপুৰ জিলা আয়ুক্ত কাৰ্যালয়ৰ জ্যেষ্ঠ সহায়িকা জুনুমা কোচে আঁত ধৰা অনুষ্ঠানটিত আদৰণী ভাষণ প্ৰদান কৰে লখিমপুৰ জিলাৰ ভাৰপ্ৰাপ্ত আয়ুক্ত তথা জিলা উন্নয়ন আয়ুক্ত উৎপল বৰাই। অনুষ্ঠানসমূহত জিলা অতিৰিক্ত আয়ুক্ত ভাস্কৰজ্যোতি বৰা, জিলা সহকাৰী আয়ুক্ত অর্জিত মহাজন, জ্যোতিকনা চেতিয়া, জানুমা সোণোৱাল, নিজৰা বড়ো, নাওবৈচা চক্ৰ বিষয়া ৰাহুল পেগু, নাৰায়ণপুৰ খণ্ড উন্নয়ন বিষয়া শেৱালি পেগু, কৰুণাবাৰী খণ্ড উন্নয়ন বিষয়া কাবেৰী বৰগোহাঁই, নাওবৈচা খণ্ড উন্নয়ন বিষয়া দিব্যজ্যোতি শইকীয়া, বিহপুৰীয়া খণ্ড উন্নয়ন বিষয়া ভৃগুপতি ৰয়, নাৰায়ণপূৰ পৌৰসভাৰ পৌৰপতি হৰি চন্দক, বিহপুৰীয়া পৌৰসভাৰ পৌৰপতি দীপশিখা বৰা, দেউৰী স্বায়ত্তশাসিত পৰিষদৰ অধ্যক্ষা অমৃতপ্ৰভা দেউৰী, লখিমপুৰ নগৰ উন্নয়ন প্ৰাধিকৰণৰ অধ্যক্ষ সমীৰণ কোঁৱৰ, সমাজকৰ্মী ফণীধৰ বৰুৱা, সমাজকৰ্মী দীপক বৰদলৈ,ধেমাজি নগৰ উন্নয়ন প্ৰাধিকৰনৰ অধ্যক্ষ তুলন কোঁৱৰ লগতে বিভিন্ন গন্য মান্য ব্যক্তি, হিতাধিকাৰীসকল, জিলা প্ৰশাসন আৰু সংশ্লিষ্ট বিভাগৰ বিষয়াসকল উপস্থিত থাকে।
প্ৰেৰক জীৱন গোস্বামী