নিয়মীয়া বাৰ্তা ১৬ অক্টোবৰঃ মঙলদৈৰ বামুণপাৰাৰ পথাৰত বন্তি প্রজ্বলন কৰি কাতি বিহু পালন কৰিব মুখ্যমন্ত্রী সর্বানন্দ সোণোৱালে৷ এগছি–দুগছি নহয়, এহেজাৰ চাকিৰে সন্ধিয়া উজলি উঠিব মঙলদৈৰ বামুণপাৰা পথাৰ৷ মুখ্য অতিথি হিচাপে অংশগ্রহণ কৰিব মুখ্যমন্ত্রী সোণোৱালে৷ কাতি বিহুৰ সন্ধিয়া বামুণপাৰা পথাৰত প্রায় এহেজাৰ মহিলাই চাকি জ্বলোৱা এই কার্যসূচীত অংশগ্রহণ কৰিব৷ মুখ্যমন্ত্রীগৰাকীৰ এই বিশেষ কার্যসূচীৰ বাবে ইতিমধ্যে মঙলদৈৰ সাংসদ দিলীপ শইকীয়া, মঙলদৈৰ বিধায়ক গুৰুজ্যোতি দাস, উপায়ুক্ত দিলীপ বৰুৱা, আৰক্ষী অধীক্ষক অমৃত ভূঞাই মোহনপুৰৰ পথাৰ পর্যবেক্ষণ কৰে৷ মঙলদৈৰ বামুণপাৰাৰ সমীপৱর্তী পথাৰত মহিলাসকলৰ এই কার্যসূচীত ক’ভিড প্রট’কল মানি সহযোগিতা কামনা কৰিছে দৰং জিলা প্রশাসনে৷