🔹 শীৰ্ষ আৰক্ষী বিষয়াক আক্ৰমণৰ চেষ্টা চলোৱা মাতাল জোৱান কৌশিকক আটক
নিয়মীয়া বাৰ্তা, ৫ অক্টোবৰ : উগ্ৰপন্থীবিৰোধী কঠোৰ অভিযানৰ বাবে সাজু কৰি তোলা অসম আৰক্ষী কমাণ্ডো বেটেলিয়নৰ এগৰাকী সুৰামত্ত জোৱানে কালি নিশা দুটাকৈ স্থানত অপ্ৰীতিকৰ পৰিস্থিতিৰ সৃষ্টি কৰা ঘটনাই ৰাইজৰ মাজত তীব্ৰ প্ৰতিক্ৰিয়াৰ সৃষ্টি কৰিছে ৷ আন নালাগে, শিৱসাগৰ সদৰ আৰক্ষী থানাৰ ভিতৰত কেইবাগৰাকীও শীৰ্ষ বিষয়াক আক্ৰমণৰ বাবে চোঁচা লোৱা মাতাল জোৱানজনক অৱশেষত হেণ্ডকাপ লগাই লকআপত ভৰাই থ’বলগীয়া পৰিস্থিতিৰ সৃষ্টি হয় ৷ প্ৰবেচনাৰ অৱস্থাতেই এনেদৰে নিজৰ বেৰেকৰ লগতে সদৰ থানাৰ ভিতৰত উদ্ভণ্ডালি কৰা কমাণ্ডো বেটেলিয়নৰ জোৱানজনৰ নাম কৌশিক সোণোৱাল বুলি জানিব পৰা গৈছে ৷ প্ৰাপ্ত বাতৰি মতে, বৰ্ডিং ৰোডস্থিত শিৱসাগৰ গৱৰ্নমেন্ট স্কুলত বিগত দহটা দিন ধৰি বাহৰ পাতি আছে কমাণ্ডো জোৱানৰ ১০৪ জনীয়া এটা দলে ৷ দিনৰ ভাগত চহৰৰ নিৰাপত্তাত নিয়োজিত হৈ থকা শিবিৰটোৰ জোৱানসকলৰ মাজৰে কৌশিক সোণোৱালে গোপনে শিবিৰৰ পৰা ওলাই গৈ অত্যধিক সুৰাপান কৰি শিবিৰলৈ আহি উদ্ভণ্ডালি আৰম্ভ কৰে ৷ সম্পূৰ্ণ অ-প্ৰকৃতিস্থ অৱস্থাত থকা কৌশিকে এডাল টাঙোনেৰে শিবিৰটোৰ দায়িত্বত থকা মেজৰগৰাকীক আক্ৰমণৰ উদেশ্যে বিচাৰি চলাথ কৰি এক ভয়ংকৰ পৰিৱেশৰ সৃষ্টি কৰে ৷ কোনোপধ্যে নিয়ন্ত্ৰণলৈ নহা কৌশিকক নিয়ন্ত্ৰণৰ বাবে সদৰ আৰক্ষীক অৱগত কৰাত লগে লগেই আৰক্ষীৰ এটা দল উপস্থিত হৈ কৌশিকক আটক কৰি সদৰ থানালৈ লৈ আনে ৷ কিন্তু সদৰ থানাতো অধিক উন্মাদৰ দৰে আচৰণ কৰা কৌশিক সোণোৱাল নামৰ কমাণ্ডো জোৱানজনে সদৰ থানাত সেই সময়ত কৰ্তব্যৰত বিষয়াৰ লগতে ভাৰপ্ৰাপ্ত বিষয়াগৰাকীকো আক্ৰমণৰ বাবে চোঁচা লয় ৷ অৱশেষত সদৰ আৰক্ষীয়ে হেণ্ডকাপ লগাই লকআপত ভৰাইহে পৰিস্থিতি নিয়ন্ত্ৰণ কৰে ৷ উল্লেখ্য যে নৱনিযুক্ত কমাণ্ডো জোৱানসকলক হাতে হাতে অত্যাধুনিক এ কে ফৰ্টি চেভেন ব্যৱহাৰৰ বাবে দিয়া হৈছে ৷ নিশাও বেৰেকৰ ভিতৰত প্ৰতিগৰাকী জোৱানৰ লগত থাকে এই অত্যাধুনিক অস্ত্ৰবিধ ৷ কিন্তু আন সতীৰ্থসকলে কালি নিশা কৌশিকৰ উন্মাদ আচৰণ দেখিয়েই সেই স্থানৰ পৰা আঁতৰাই ৰাখিছিল এ কে ফৰ্টি চেভেন ৰাইফলটো ৷ অন্যথা আন এক ভয়ংকৰ ঘটনা সংঘটিত হোৱাৰ সম্ভাৱনা প্ৰবল হৈ উঠিছিল ৷ ইফালে, নিশাই স্বাস্থ্য পৰীক্ষাৰ অন্তত আটকাধীন জোৱান কৌশিক সোণোৱালক বিভাগীয়ভাৱে বেটেলিয়ন কৰ্তৃপক্ষৰ হাতত বিধিগত শাস্তিমূলক ব্যৱস্থাৰ বাবে চমজাই দিয়া বুলি আৰক্ষীৰ এক সূত্ৰই জনাইছে ৷
প্ৰেৰক আশ্ৰফুৰ ৰহমান