নিয়মীয়া বাৰ্তা, ১১ জুনঃ কামৰূপ জিলাৰ বকো বিধানসভা সমষ্টিৰ বামুণীগাঁৱৰ সামাজিক সংগঠন বামুণীগাঁও আঞ্চলিক প্ৰদীপ সংঘৰ উদ্যোগত বৃহত্তৰ বামুণীগাঁও অঞ্চলৰ হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হোৱা ছাত্ৰ-ছাত্ৰীসকলক সম্বৰ্ধনা জনোৱাৰ উদ্দেশ্যৰে কাৰ্যালয় প্ৰাংগণত এক অভিনন্দন অনুষ্ঠান অনুষ্ঠিত হয়। এই অনুষ্ঠানত বামুণীগাঁও অঞ্চলৰ সুখ্যাতিৰে উত্তীৰ্ণ হোৱা ১৭গৰাকী ছাত্ৰ-ছাত্ৰীক প্ৰদীপ সংঘৰ ফালৰ পৰা সম্বৰ্ধনা জ্ঞাপন কৰা হয়, লগতে অনাগত দিনত বামুণীগাওঁ অঞ্চললৈ বহু উচ্চ পৰ্যায়ৰ পৰীক্ষাত উত্তীৰ্ণ হৈ সুনাম কঢ়িয়াবলৈ আহ্বান জনায়। এই অনুষ্ঠানত মুখ্য অতিথি হিচাপে ফখৰুদ্দিন আলী আহমেদ মহাবিদ্যালয়ৰ সহকাৰী অধ্যাপক কাঞ্চন চৌধুৰী; যুৱ বক্তা হিচাপে উপস্থিত থাকে কটন বিশ্ববিদ্যালয়ৰ ছাত্ৰ একতা সভাৰ সভাপতি ত্ৰিদিব ভাগৱতী, বামুণীগাঁও অঞ্চলৰ বহুকেইজন বিশিষ্ট ব্যক্তিৰ লগতে সংগঠনটোৰ সমূহ বিষয়ববীয়া।
প্ৰেৰক প্ৰীতম বায়ন