নিয়মীয়া বাৰ্তা, ১০ জুলাইঃ কটন বিশ্ববিদ্যালয়ত স্নাতক দ্বিতীয় আৰু চতুর্থ ষাণ্মাসিকৰ পৰীক্ষাসমূহ বাতিল কৰা হৈছে৷ একেসময়তে বিশ্ববিদ্যালয়খনৰ বি চি এ আৰু এম চি এ পাঠ্যক্রমৰ ২য় আৰু ৪থ ষাণ্মাসিক আৰু স্নাতকোত্তৰ পাঠ্যক্রমৰ দ্বিতীয় ষাণ্মাসিকৰো পৰীক্ষা অনুষ্ঠিত নহয়৷ কটন বিশ্ববিদ্যালয়ৰ কার্যকৰী পৰিষদৰ বৈঠকত এই সিদ্ধান্ত গ্রহণ কৰা হৈছে৷
ইয়াৰ সলনি পূর্বৰ ষাণ্মাসিকত দেখুওৱা পাৰদর্শিতাৰ ভিত্তিত বিশেষ ব্যৱস্থাৰ জৰিয়তে ছাত্র–ছাত্রীসকলক পৰৱর্তী ষাণ্মাসিকলৈ উন্নীত কৰা হ’ব৷ অহা ৩ আগষ্টৰ পৰা কটনৰ নতুন ষাণ্মাসিকৰ অনলাইন পাঠদান আৰম্ভ হ’ব৷