🔹 ডিআই বাহনসহ ধৃত ১
নিয়মীয়া বাৰ্তা, ১৬ আগষ্ট : আজি ধুবুৰী চহৰৰ ১০নং ৱাৰ্ডৰ নুনিয়াপট্টী অঞ্চলত আৰক্ষীয়ে চিমেন্টৰ বস্তাবাহী এখন ডি আই বাহনৰ পৰা দুটাকৈ গৰু উদ্ধাৰ কৰা বুলি জানিব পৰা গৈছে। অতি নিৰ্মমভাৱে বান্ধি বাংলাদেশলৈ সৰবৰাহ কৰিবলৈ চিমেন্টৰ বস্তাৰ মাজত লুকাই অনা এ এছ-১৭চি-৫২৫৫ নম্বৰৰ বাহনখনৰ চালকসহ আন কেইবাজনে পলায়ন কৰিবলৈ সক্ষম হয় যদিও আৰক্ষীয়ে আব্দুল ছালাম নামৰ এজন লোকক কৰায়ত্ত কৰিবলৈ সক্ষম হোৱা বুলি প্ৰকাশ। ধৃত ব্যক্তিজন ধুবুৰী চহৰৰ ১১নং ৱাৰ্ডৰ বাহাদুৰটাৰীৰ বাসিন্দা। আনহাতে, চিমেন্টবাহী সেই ডি আই বাহনখনো জব্দ কৰিছে আৰক্ষীয়ে। ইপিনে, আজিৰ ঘটনাৰ পিছত চুবুৰীয়া পশ্চিমবংগৰ পৰা চিমেন্টবাহী বাহন এখনেৰে কিদৰে ধুবুৰী জিলাৰ কেইবাখনো আৰক্ষী থানা আৰু চকী পাৰ হৈ গৰুসহ আহি ধুবুৰীত উপস্থিত হ’বলৈ সক্ষম হ’ল, তাক লৈ প্ৰশ্নৰ উদ্ৰেক ঘটিছে।
প্ৰেৰক অমিতাভ চক্ৰৱৰ্তী