নিয়মীয়া বাৰ্তা, ৩০ ডিচেম্বৰ : যোৱানিশা ৰংজুলি বনাঞ্চলিক বিষয়া খলিলুৰ ৰহমান আৰু গোৱালপাৰাৰ কনচুলেচন ৰেঞ্জাৰ ধৰ্মেন্দ্ৰ দাসৰ নেতৃত্বত যৌথ অভিযান চলাই শিমলীতোলাৰ কাণকাটা গাঁৱৰ পৰা এটি কেঁকোসাপ উদ্ধাৰ কৰাৰ লগতে এগৰাকী লোকক গ্ৰেপ্তাৰ কৰে I ৰংজুলিৰ আঞ্চলিক বন বিষয়াগৰাকীয়ে জানিবলৈ দিয়া মতে, এক গোপন সূত্ৰৰ পম খেদি কাণকাটা গাঁৱত এটা কেঁকোসাপ ধৰি ৰখা বুলি নিশ্চিত হয় আৰু সেই সূত্ৰৰ ভিত্তিত নিশা অভিযান চলায় I অভিযানত কাণকাটা গাঁৱৰ আনোৱাৰ আলীৰ ঘৰৰ পৰা উদ্ধাৰ কৰে এটা কেঁকোসাপ I বন বিভাগৰ দলটোৱে কেঁকোসাপটো উদ্ধাৰ কৰি লৈ অহাৰ লগতে আনোৱাৰ আলীক গ্ৰেপ্তাৰ কৰে I আনোৱাৰ আলীয়ে ঘৰত ধৰি ৰখা কেঁকোসাপটোৰ ওজন প্ৰায় ২২৯ গ্ৰাম বুলি বন বিষয়াই জানিবলৈ দিয়ে I অৱশ্যে ধৃত আনোৱাৰ আলীয়ে কেঁকোসাপটো এনেয়ে ধৰি ৰখা বুলি জানিবলৈ দিয়ে যদিও তেওঁ কোনো বন্যপ্ৰাণী সৰবৰাহকাৰীৰ সৈতে জড়িত আছে নেকি, সেয়া বন বিভাগে নিৰীক্ষণ কৰি আছে বুলি জানিবলৈ দিয়ে I
প্ৰেৰক কল্যাণ ৰয়