নিয়মীয়া বাৰ্তা, ১৪ জুনঃ শিমলীতোলা আৰক্ষী চকীৰ অন্তৰ্গত কামাৰপোতাত বুধবাৰৰ পুৱাই সংঘটিত হয় এক ভয়ানক অগ্নিকাণ্ড,সম্পূৰ্ণকৈ ভস্মীভূত হয় এখন গেলামালৰ দোকান।দোকানৰ ধূপৰ জুঁইৰ পৰা সূত্ৰপাত ঘটা বিধ্বংসী অগ্নিকাণ্ডত গেলামালৰ দোকানখন সম্পূৰ্ণকৈ ভস্মীভূত হয়। জানিব পৰা মতে গাঁৱখনৰ নৃপেন ভৰালী নামৰ এজনৰ গেলামাল দোকানত পুৱা দোকানৰ ধূপৰ ফিৰিঙতি মজিয়াত পৰে আৰু ক্ৰমান্বয়ে দোকানীৰ অগোচৰে জুঁইকুৰা সম্প্ৰসাৰিত হয়। লাহে-লাহে তেলৰ টিনত জুঁই লাগে আৰু পাছলৈ নিয়ন্ত্ৰণৰ বাহিৰলৈ যায় ,আনকি দোকানৰ জুঁইয়ে দোকানী নৃপেন ভৰালীৰ ভৰিতো পোৰে। উক্ত অগ্নিকাণ্ডত নিমিষতে দোকানৰ বয়বস্তু, আচৱাব সকলো পুৰি ছাঁই হয় আনকি কেচ বাকচত থকা নগদ প্ৰায় একৈশ হাজাৰ টকাও পুৰি ছাঁই হয়। দাউদাউকৈ জ্বলি উঠা জুঁই আৰু ধোঁৱাই চানি ধৰে অঞ্চলটো ,স্থানীয় ৰাইজে বহু কষ্টৰ অন্তত পানী ,বালি আদি মাৰি কোনোমতে জুঁইকুৰা নুমুৱাবলৈ সক্ষম হয় যদিও ইতিমধ্যে দোকান খনৰ সকলো শেষ হৈ যায় জুঁইত। অগ্নিকাণ্ডৰ ফলত হোৱা ক্ষয়ক্ষতিৰ পৰিমাণ কেবালাখ টকা হ’ব বুলি উল্লেখ প্ৰত্যক্ষদৰ্শী তথা গাঁৱবাসীৰ।মুঠতে পুৱাৰ ভাগতে ৰাজপথৰ কাষৰ দোকান এখন এইদৰে পুৰি ছাঁই হোৱাক কেন্দ্ৰ কৰি তীব্ৰ চাঞ্চল্য বিয়পে কামাৰপোতা গাঁৱত,একেদৰে পেটেভাতে চলা দোকানী জনৰ পৰিয়ালটোতো বিয়পে এক শোকাকুল পৰিবেশ।
প্ৰেৰক সঞ্জীৱ কুমাৰ দাস