বিশেষ বাৰ্তা, ১৬ মেঃ আজি পথ দুৰ্ঘটনাত ৰহস্যজনক মৃত্যু হোৱা মৰিকলং আৰক্ষী চকীৰ ভাৰপ্রাপ্ত আৰক্ষী বিষয়া জোনমণি ৰাভাৰ মৃত্যুৰ তদন্তৰ দায়িত্ব চিআইডিক অর্পণ কৰা হৈছে৷ এই কথা ঘোষণা কৰিছে অসম আৰক্ষীৰ সঞ্চালকপ্রধান জি পি সিঙে৷ জোনমণি ৰাভাৰ দুর্ঘটনাৰ উপৰি জোনমণিক অভিযুক্ত কৰি লখিমপুৰ থানাত ৰুজু হোৱা ১৮৩/২০২৩ নম্বৰৰ গোচৰটোৰ তদন্তৰ ভাৰো চিআইডিক অর্পণ কৰা হৈছে বুলি জি পি সিঙে সামাজিক মাধ্যমৰ জৰিয়তে প্রকাশ কৰিছে৷ এই প্রসংগত জি পি সিঙে কয়– ‘উত্তৰ লখিমপুৰ থানাত যোৱা ১৫ মে’ত ভাৰতীয় দণ্ডবিধিৰ ১২০ বি/৩৯৫/৩৯৭/৩৪৭/৩৮৭ ধাৰাৰ অধীনত ১৮৩/২০২৩ নম্বৰৰ এখন এজাহাৰ পঞ্জীয়ন হৈছে৷ য’ত উপ–পৰিদর্শক জোনমণি ৰাভাক এগৰাকী অভিযুক্ত হিচাপে উল্লেখ কৰা হৈছে৷ লখিমপুৰ আৰক্ষী আৰু নগাঁও আৰক্ষীয়ে এই অপৰাধৰ পঞ্জীয়নৰ পাছত আইনী প্রক্রিয়া গ্রহণ কৰিছে৷ একে সময়তে ১৬ মে’ৰ পুৱতি নিশা জোনমণি ৰাভাৰ এটা পথ দুর্ঘটনাত মৃত্যু হয়৷ সমাজৰ বিভিন্ন ক্ষেত্রৰ লোকসকলৰ আহ্বানমর্মে ১৮৩/২০২৩ নম্বৰৰ এজাহাৰ আৰু জোনমণি ৰাভাৰ মৃত্যুৰ তদন্ত চিআইডিক অর্পণ কৰিবলৈ সিদ্ধান্ত গ্রহণ কৰা হৈছে৷’ উল্লেখ্য যে জোনমণিৰ মৃত্যুক লৈ বিভিন্ন পক্ষই বিভিন্ন প্রশ্নৰ অৱতাৰণা কৰি আহিছে৷ এয়া এক পৰিকল্পিত হত্যাকাণ্ড বুলি একাংশই অভিযোগ কৰি ইয়াৰ সঠিক তদন্তৰ দাবী উত্থাপন কৰিছে৷