বিশেষ বাৰ্তা, ১ অক্টোবৰ : ভাৰতীয় দলৰ প্ৰাক্তন অধিনায়ক মহেন্দ্ৰ সিং ধোনীৰ ভিডিঅ’ ছ’চিয়েল মিডিয়াত ভাইৰেল হৈ পৰিছে, য’ত তেওঁ টেনিছ ক’ৰ্টত নিজৰ দক্ষতা প্ৰদৰ্শন কৰা দেখা গৈছে। যি সময়ত ধোনীয়ে এই ভিডিঅ’টোত নিজৰ শ্বটেৰে সকলো অনুৰাগীৰ হৃদয় জয় কৰি আছে, সেই সময়ত তেওঁৰ ফিটনেছেও সকলোকে আপ্লুত কৰিলে। উল্লেখ্য যে আই পি এলৰ ১৬সংখ্যক ছিজন শেষ হোৱাৰ পিছত ধোনীৰ আঁঠুৰ অপাৰেচন হৈছিল, তাৰ পিছত এতিয়া তেওঁ ইয়াৰ পৰা সম্পূৰ্ণৰূপে সুস্থ হৈ উঠিছে। ক্ৰিকেটৰ উপৰি মহেন্দ্ৰ সিং ধোনীক আন খেলতো প্ৰায়ে খেলাৰ চেষ্টা কৰা দেখা যায়। ইয়াত তেওঁ গলফ আৰু টেনিছ খেলি বৰ ভাল পায়। আন্তঃৰাষ্ট্ৰীয় ক্ৰিকেটক বিদায় দিয়াৰ পিছত এতিয়া ধোনীক কেৱল আই পি এলত খেলা দেখা গৈছে। ধোনীক বিশ্ব ক্ৰিকেটৰ মহান অধিনায়কৰ ভিতৰত গণ্য কৰা হয়। ধোনীৰ অধিনায়কত্বত অন্তিমবাৰৰ বাবে আই চি চি ট্ৰফী জয় কৰিবলৈ সক্ষম হৈছিল টীম ইণ্ডিয়াই, ২০১৩ চনত ভাৰতে চেম্পিয়নছ ট্ৰফী লাভ কৰিছিল। ৪২ বছৰীয়া ধোনীয়ে এতিয়াও অনুৰাগীৰ হৃদয়ত স্থান লাভ কৰে আৰু সেইবাবেই তেওঁ য’তেই যায় তাতেই অনুৰাগীৰ ভিৰ দেখা যায়। শেহতীয়াকৈ ধোনীয়ে ছুটীৰ বাবে আমেৰিকালৈ যোৱাৰ সময়ত ইউ এছ অ’পেনত কাৰ্লোছ আলকাৰাজৰ খেলখনো উপভোগ কৰিছিল।