🔹 বিশ্বৰ ষষ্ঠ সৰ্বোচ্চ অট্টালিকা দক্ষিণ কোৰিয়াৰ ল’টে ৱৰ্ল্ড টাৱাৰ
বিশেষ বাৰ্তা, ১১ জুন : সঁচাকৈয়ে এক বিৰল কৃতিত্ব। ডিব্ৰুগড় বা অসমৰ বাবেই নহয়; সমগ্ৰ দেশৰ বাবেই এয়া এক উল্লেখযোগ্য অৱদান। ডিব্ৰুগড়ৰ এজন প্ৰখ্যাত দন্ত চিকিৎসক ডাঃ শুভদীপ পালে দক্ষিণ কোৰিয়াৰ ছিউলৰ ল’টে ৱৰ্ল্ড টাৱাৰৰ ১২৩নং মহলাত থকা পিয়ানোত ভাৰতীয় ৰাষ্ট্ৰীয় সংগীত “জন গণ মন” বজাই সকলোৰে দৃষ্টি আকৰ্ষণ কৰিবলৈ সক্ষম হৈছে।উল্লেখ্য যে ল’টে ৱৰ্ল্ড টাৱাৰৰ উচ্চতা ৫৫৫ মিটাৰ (১,৮২১ ফুট)। এই টাৱাৰ যথেষ্ট আকৰ্ষণীয় আৰু যাৰ ফলত ই বিশ্বৰ ষষ্ঠ সৰ্বোচ্চ অট্টালিকাত স্থান লাভ কৰিছে। ডাঃ পালে পিয়ানোত ৰাষ্ট্ৰীয় সংগীত বজাই থকা ভিডিঅ’টোৱে ইতিমধ্যে বহুল প্ৰশংসা লাভ কৰিছে আৰু ভাইৰেল হৈ পৰিছে।জানিব পৰা অনুসৰি দক্ষিণ কোৰিয়া ভ্ৰমণৰ সময়ত যোৱা ৯ জুনত তেওঁ তাত এখন বিশ্ব সন্মিলনত “মূল মতামত নেতা” হিচাপে আমন্ত্ৰণৰ অংশ হিচাপে ৰাষ্ট্ৰীয় সংগীত বজাইছিল। ডাঃ পালৰ মতে, ল’টে টাৱাৰৰ ১২৩নং মহলাত পিয়ানো বজাবলৈ তেওঁৰ সতীৰ্থ সহকৰ্মী আৰু অন্যান্য ভাৰতীয়সকলে তেওঁক অনুৰোধ কৰিছিল। মানৱ নিৰীক্ষণ কেন্দ্ৰত উপস্থিত থকা সকলোকে আনন্দিত কৰি ভাৰতৰ ৰাষ্ট্ৰীয় সংগীত বজাই তেৱোঁ আনন্দ লাভ কৰা বুলি উল্লেখ কৰি কয়- “ইমান বৃহৎ উচ্চতাত ৰাষ্ট্ৰীয় সংগীত বজোৱাটো এক অবিশ্বাস্য অভিজ্ঞতা আছিল। মই গৌৰৱান্বিত যে মোৰ দেশৰ ৰাষ্ট্ৰীয় সংগীতক এই অনন্য ধৰণে প্ৰদৰ্শন কৰাৰ সুযোগ পাইছোঁ। মই নিশ্চিত নহয়, কিন্তু ই হয়তো সৰ্বোচ্চ বিন্দু আছিল। য’ত আমাৰ ৰাষ্ট্ৰীয় সংগীত আজিলৈকে কোনোৱে বজাইছে।’ তেওঁ ৰাষ্ট্ৰীয় সংগীত বজোৱা সমিক গ্ৰেণ্ড পিয়ানোক বিশ্বৰ অন্যতম উন্নত পিয়ানো বুলি গণ্য কৰা হয়, আৰু ই ল’টে টাৱাৰৰ সৰ্বোচ্চ স্থানত অৱস্থিত। ডাঃ পালৰ সংগীতৰ প্ৰতি থকা প্ৰেম কোনো নতুন কথা নহয়। পূৰ্বেও বহুকেইটা মিউজিক এলবামৰ জৰিয়তে সমাদৰ লাভ কৰা বিগত ৩০ বছৰতকৈও অধিক সময় ধৰি পিয়ানো বজাই অহা ডাঃ পালে যোৱা অক্টোবৰ মাহত ছিংগাপুৰৰ চেণ্টোছা দ্বীপকে ধৰি বিভিন্ন ৰাজহুৱা স্থানত অনুষ্ঠান পৰিৱেশন কৰিছিল। লটে ৱৰ্ল্ড টাৱাৰ একমাত্ৰ আকাশচুম্বী ঘৰ নহয়, যাৰ ওপৰৰ মহলাত পিয়ানো আছে। বিশ্বৰ আটাইতকৈ ওখ অট্টালিকা ডুবাইৰ বুৰ্জ খলিফাৰ ১০০নং মহলাতো পিয়ানো থকাৰ বিপৰীতে চীনৰ চাংহাই টাৱাৰৰ ৫৩নং মহলাত আছে পিয়ানো। কিন্তু সকলো ওখ অট্টালিকাৰ ওপৰৰ মহলাত পিয়ানো নাথাকে, যেনে ৱাৰিছান মেৰ্ডেকা টাৱাৰ আৰু গোল্ডিন ফাইনেন্সত ১১৭ (মহলা) কোনো পিয়ানো এই পৰ্যন্ত নাই। স্বাভাৱিকতেই ডিব্ৰুগড়ৰ সু-সন্তান তথা এগৰাকী প্ৰখ্যাত দন্ত চিকিৎসকে সুদূৰ দক্ষিণ কোৰিয়াৰ ছিউলৰ ল’টে ৱৰ্ল্ড টাৱাৰৰ ১২৩নং মহলাত অৱস্থিত পিয়ানোত ভাৰতৰ ৰাষ্ট্ৰীয় সংগীত বজাই সকলোৰে দৃষ্টি আকৰ্ষণ কৰিবলৈ সক্ষম হোৱাটোৱে এক বিৰল চানেকি বুলি অভিহিত হৈছে।
প্ৰেৰক বিভাস দুৱৰা