বিশেষ বাৰ্তা, ২২ ছেপ্টেম্বৰঃ ব্রহ্মকুমাৰী প্রতিষ্ঠানৰ আজিৰে পৰা ২৫ ছেপ্টেম্বৰলৈ ৰাজস্থানৰ মাউণ্ট আবুত অনুষ্ঠিত হৈছে গোলকীয় সন্মিলন৷ উক্ত সন্মিলন ভাগ লয় অসমৰ মুখ্যমন্ত্ৰী ড০ হিমন্ত বিশ্ব শৰ্মাই। উক্ত ছামিটত অংশগ্ৰহণ কৰি ড০ শৰ্মাই কয়- শংকৰদেৱে আধ্যাত্মিকতা আৰু সংস্কৃতিৰ জৰিয়তে সমাজত সমন্বয়ৰ এনাজৰীডাল সুদৃঢ় কৰি গৈছে৷ ঐশ্বৰিক জ্ঞান বিষয়বস্তুৰ ওপৰত আয়োজিত এই সন্মিলনত আজি ভাষণ প্রদান কৰি মুখ্যমন্ত্রী ড০ হিমন্ত বিশ্ব শর্মাই কয়– ভাৰতত চলা ভক্তি আন্দোলনৰ সময়তে অসমত মহাপুৰুষ শ্রীমন্ত শংকৰদেৱে প্রৱর্তন কৰিছিল বৈষ্ণৱ সংস্কৃতি৷ ইয়াৰ জৰিয়তে গুৰুজনাই সাংস্কৃতিক, ভাতৃত্ববোধ যোগাই তুলিবলৈ সক্ষম হৈছিল৷ সামাজিক সম্প্রীতি গঢ়ি তোলাৰ ক্ষেত্রত মহাপুৰুষজনাই এক শৰণ নাম ধর্ম প্রৱর্তন কৰিছিল৷ মুখ্যমন্ত্রী ড০ শর্মাই তেওঁৰ ভাষণত ইয়াকো উল্লেখ কৰে যে যেতিয়া মই ভাৰতক আধ্যাত্মিকতাৰ ক্ষেত্রত বিশ্বনেতা হিচাপে গঢ়ি তোলাৰ এক সংকল্প দেখিবলৈ পাইছো৷ আৰু এই অনুভৱ মই পৱিত্র অনুভৱ বুলিয়েই ধাৰণা কৰো৷ আমি আধ্যাত্মিক জ্ঞানৰ বিষয়ে আলোচনা কৰিবলৈ এই সন্মিলনত উপস্থিত হৈছো৷ ভাৰত এতিয়া বিশ্বৰ সর্ববৃহৎ আধ্যাত্মিকতাৰ ক্ষেত্র হৈ পৰিছে৷ ভাৰত বিশ্বনেতা হোৱাৰ দিশে আগবাঢ়িছে৷ দেশখনৰ এই যাত্রাত পাঁচ হাজাৰ বছৰ পুৰণি৷ আমাৰ ঋষি–মুনিসকলে যি জ্ঞান আমাক দি থৈ গৈছে সেই জ্ঞানক আমি অনুকৰণ কৰিলে সমগ্র বিশ্বকে আমি ভাৰতৰ আধ্যাত্মিকতাৰ জ্ঞান প্রদান কৰিবলৈ সক্ষম হ’ম৷ ভাৰত হৈছে আধ্যাত্মিকতাৰ এক উৎস৷ আমাৰ সংবিধান পশ্চিমীয়া ধাৰণাৰ পৰা ধাৰ কৰি লোৱা হোৱা নাই৷ আমাৰ সংবিধান মুনি আৰু ঋষিসকলৰ পুৰণি শিক্ষাৰ প্রতিফলন৷ আমাৰ সংবিধান আৰু ঋষিসকলৰ জ্ঞান যদি আমি অনুকৰণ কৰো, তেন্তে আমি বিশ্বক জ্ঞান দিবলৈ সক্ষম হ’ম৷ তেওঁ কয়– আজি ভাৰতৰ বাবে এক সোণালী দিন৷ প্রধানমন্ত্রী নৰেন্দ্র মোদীৰ নেতৃত্বত নাৰী শক্তি বন্দনা বিধেয়ক গৃহীত হ’ল৷ ইয়াৰ জৰিয়তে দেশত নাৰীৰ শক্তি তথা গুৰুত্বক প্রাধান্য দিয়া হৈছে৷ ব্রহ্মাকুমাৰীসকল হৈছে এক উদাহৰণ৷ যিয়ে নাৰী শক্তিক এক সংগঠিত ৰূপত আগুৱাই নিব পাৰে৷ উল্লেখ্য যে গোলকীয় সন্মিলন উপলক্ষে মাউণ্ট আবুত থকা ব্রহ্মকুমাৰী প্রতিষ্ঠানত মুখ্যমন্ত্রী ড০ শর্মাই আজি কাহিলিপুৱাতে উপস্থিত হয়৷ মুখ্যমন্ত্রীগৰাকীক আজি পুৱাৰ ভাগত গার্ড অব অনাৰেৰে অভিবাদন জনোৱা হয়৷ ইয়াৰ পিছতেই মুখ্যমন্ত্রী ড০ শর্মাই আজি ৰাজস্থানৰ কোটাত এক ৰেলীক সম্বোধন কৰে৷ এই সভাতেই তেওঁ কংগ্রেছ নেতা ৰাহুল গান্ধীৰ বিৰুদ্ধে সৰব হৈ পৰে৷ মুখ্যমন্ত্রী ড০ শর্মাই কয়– ৰাহুল গান্ধী তথা কংগ্রেছে তেলেংগানাবাসীক মাহিলি ধন প্রদানৰ আঁচনিৰ প্রতিশ্রুতি দিছে৷ কংগ্রেছে কৈছে যে তেলেংগানাত শাসনলৈ আহিলে মহিলাসকলৰ বেংক একাউণ্টত ২৫০০ টকা ভৰাই দিয়া হ’ব৷ কিন্তু ৰাজস্থানত এতিয়াও কংগ্রেছৰ শাসনেই চলি আছে৷ যদি কংগ্রেছে মহিলাৰ প্রতি সন্মান প্রদর্শন কৰে, তেন্তে ৰাজস্থানত এই প্রতিশ্রুতি পালন নকৰে কিয়? ইয়ে স্পষ্ট কৰে যে কংগ্রেছ আৰু বিশ্বাসঘাটকতা দুটা বেলেগ শব্দ নহয়৷ মুখ্যমন্ত্রীয়ে পেট্র’লৰ মূল্যক লৈও কংগ্রেছশাসিত চৰকাৰখনক সমালোচনা কৰি কয় যে অসম দিল্লীৰ পৰা তিনি হাজাৰ কিলোমিটাৰ দূৰত্বত আছে, য’ত পেট্র’লৰ মূল্য ৯৮ টকা৷ কিন্তু দিল্লীৰ ওচৰত থকা ৰাজস্থানত প্রতিলিটাৰ পেট্র’লৰ মূল্য ১০৮ টকা৷ ৰাজস্থানত পেট্র’ল–ডিজেল আৰু বিদ্যুতৰ মাচুল এনেধৰণে বৃদ্ধি হ’লে ৰাজ্যখনত মুদ্রাস্ফীতি কি পর্যায়ত পাব সেয়া সকলোৱে চিন্তা কৰা উচিত৷