নিয়মীয়া বাৰ্তা, ৩০ ডিচেম্বৰ : দক্ষিণ শালমাৰা-মানকাচৰ জিলাত অব্যাহত আছে ড্ৰাগছৰ ৰমৰমীয়া বেহা। জিলাখনত এটা অসাধু চক্ৰই দীৰ্ঘদিন ধৰি ড্ৰাগছৰ ৰমৰমীয়া বেহা চলাই আহিছে। জিলাখনৰ আৰক্ষীয়ে সময়ে সময়ে বিভিন্ন প্ৰান্তত অভিযান চলাই বৃহৎ পৰিমাণৰ নিচাজাতীয় সামগ্ৰী জব্দ কৰাৰ লগতে ড্ৰাগছ সৰবাহকাৰীক আটক কৰি জেল হাজোতলৈ প্ৰেৰণ কৰি আহিছে। যোৱানিশা দক্ষিণ শালমাৰা মানকাচৰ জিলাৰ আৰক্ষীয়ে গোপন খবৰৰ পমখেদি অতিৰিক্ত আৰক্ষী অধীক্ষক প্ৰতাপ দাসৰ নেতৃত্বত মানকাচৰ থানাৰ আৰক্ষীৰ সহযোগত মানকাচৰৰ জোৰডাঙ্গা গাৱৰ নুৰ আমিন নামৰ লোক এজনৰ ঘৰত ড্ৰাগছৰ বিৰুদ্ধে আৰক্ষীৰ অভিযান চলায়। অভিযান কালত ১৩ গ্ৰাম ওজনৰ হিৰোইন উদ্ধাৰ কৰাৰ লগতে নুৰ আমিনক আটক কৰিবলৈ সক্ষম হয়। আনহাতে একে নিশাই দক্ষিণ শালমাৰা থানাৰ অন্তৰ্গত বড়ছেদামাৰীত গোপন সুত্ৰৰ পমখেদি অতিৰিক্ত আৰক্ষী অধীক্ষক প্ৰতাপ দাসৰ নেতৃত্বত দক্ষিণ শালমাৰা থানাৰ আৰক্ষীৰ সহযোগত জিয়াৰুল ইছলাম নামৰ লোক এজনৰ ঘৰত অভিযান চলাই ৫৬টা য়াবা টেবলেট, ১৪৫৬ গ্ৰাম ওজনৰ ১৬৮০টা নিচাজাতীয় tramadol capsule উদ্ধাৰ কৰাৰ লগতে জিয়াৰুল ইছলামক আটক কৰিবলৈ সক্ষম হয়। আৰক্ষীয়ে আটক কৰা সৰবৰাহকাৰীদ্বয়ক অধিক তথ্যৰ বাবে আৰক্ষী থানাত মাৰাথন জেৰা অব্যাহত ৰাখিছে বুলি জানিব পৰা গৈছে। আজি উক্ত ড্ৰাগছ সৰবৰাহকাৰীদ্বয়ক হাটশিঙিমাৰীৰ ন্যায়িক আদালতত হাজিৰ কৰিব বুলি জানিব পৰা গৈছে ।
প্ৰেৰক ফাৰহাদ আহমেদ