নিয়মীয়া বাৰ্তা ডিজিটেল, ২০ ডিচেম্বৰঃ ৰাজ্যৰ বিভিন্ন প্ৰান্তত ডাম্পাৰৰ দৌৰাত্ম্য অব্যাহত আছে। এইবাৰ চিৰাং জিলাৰ আই নৈৰ হাগ্ৰামা দলঙৰ কাষতে শিল বালি কঢ়িয়াই নিয়া ডাম্পাৰে মহটিয়াই নিলে এগৰাকী পথচাৰী বৃদ্ধা মহিলাক। ফলত থিতাতে নিহত হয় পথচাৰী বৃদ্ধা মহিলাগৰাকী। নিহত বৃদ্ধা মহিলাগৰাকীক তুলসীঝোৰা গাঁৱৰ বুলেছা বেওৱা (৭৫) বুলি চিনাক্ত কৰা হৈছে। পথ দুৰ্ঘটনা সংঘটিত কৰি ডাম্পাৰসহ চালকজনে পলায়ন কৰাৰ চেষ্টা কৰে যদিও ৰাইজে পিছে পিছে খেদি যোৱাত ডাম্পাৰখন পথৰ ওপৰতে এৰি থৈ চালকজনে পলায়ন কৰে। উক্ত পথ দুৰ্ঘটনাক কেন্দ্ৰ কৰি স্থানীয় ৰাইজৰ মাজত তীব্ৰ প্ৰতিক্ৰিয়াৰ সৃষ্টি হয়। একাংশ উত্তেজিত ৰাইজে পথ অৱৰোধ কৰাৰ ফলত পথছোৱাৰে যাতায়াত ব্যাহত হৈ পৰিছে । ইফালে ঘটনাস্থলীত আৰক্ষীৰ লোক উপস্থিত হৈছে। আৰু তদন্ত আৰম্ভ কৰিছে ঘটনাৰ।