বাৰ্তা ব্যুৰো, বৰপেটা, ১৬ ডিচেম্বৰঃ এজন ঠিকাদাৰৰ আমানতৰ ধন মুকলি কৰি দিয়াৰ বাবদ উৎকোচ লৈ ভিজিলেঞ্চ আৰু এন্টি কৰাপচনৰ জালত পৰিল এজন কাৰ্যবাহী অভিযন্তা ৷ বৰপেটাৰ সৰভোগ জনীয়া সংমণ্ডলৰ কাৰ্যবাহী অভিযন্তাজনৰ নাম সঞ্জীৱ কুমাৰ দাস ৷ সৰভোগ জনীয়া সংমণ্ডলৰ কাৰ্যবাহী অভিযন্তা জনক বৰপেটা বাঘবৰ জলসিঞ্চন সংমণ্ডলৰ কাৰ্যবাহী অভিযন্তাৰ কাৰ্য়ালয়ত গ্ৰেপ্তাৰ কৰে ভিজিলেঞ্চ আৰু এন্টি কৰাপচনৰ দলে ৷ উল্লেখ্য যে সৰভোগৰ এজন ঠিকাদাৰৰ আমানতৰ ধন মুকলি কৰি দিয়াৰ বাবদ কাৰ্যবাহী অভিযন্তাজনে বিচাৰিছিল উৎকোচ ৷ ঠিকাদাৰগৰাকীয়ে উৎকোচৰ ধন আদায়ৰ দিয়াৰ পুৰ্বে যোগাযোগ কৰে ভিজিলেঞ্চ আৰু এন্টি কৰাপচন সঞ্চালকালয়ত ৷ সেই মৰ্মে আজি বিয়লি বৰপেটাত উপস্হিত হয় ভিজিলেঞ্চ এণ্ড এন্টি কৰাপচনৰ এটা দল ৷ ইপিনে উৎকোচ বিচৰা কাৰ্যবাহী অভিযন্তা সঞ্জীৱ কুমাৰ দাসে ঠিকাদাৰজনক আজি সন্ধিয়া বৰপেটা চহৰত থকা জলসিঞ্চন বিভাগৰ বৰপেটা বাঘবৰ সংমণ্ডলৰ কাৰ্যবাহী অভিযন্তাৰ কাৰ্যালয়লৈ আহি তেওঁক বিচৰা ধনখিনি দি যাবলৈ কয় ৷ সেই মৰ্মে ঠিকাদাৰজনে কাৰ্যবাহী অভিযন্তাজনক ধন আদায় দিবলৈ বৰপেটালৈ আহে ৷ আনহাতে পুৰ্ব নিৰ্ধাৰিত পৰিকল্পনা অনুসৰি ভিজিলেঞ্চ আৰু এন্টি কৰাপচনৰ দলটোও বৰপেটাত উপস্হিত হয় ৷ সৰভোগ জনীয়া সংমণ্ডলৰ কাৰ্যবাহী অভিযন্তা সঞ্জীৱ কুমাৰ দাসক বৰপেটা বাঘবৰ সংমণ্ডলৰ কাৰ্যবাহী অভিযন্তাৰ কাৰ্যালয়ৰ অন্য এটা কোঠালৈ মাতি ঠিকাদাৰজনে ধন আদায় দিয়াৰ সময়তে কাৰ্যবাহী অভিযন্তাজনক দলটোৱে হাতে লোটে ধৰা পেলায় ৷
প্ৰেৰক নৱজিত বায়ন