নিয়মীয়া বাৰ্তা, ১৫ মাৰ্চঃ হাজোৰ বুল্লুট বজাৰত আজি সংঘটিত হয় গুলীচালনাৰ ঘটনা। পাঁচজনীয়া দল এটাই ক’লা ৰঙৰ চাৰিচকীয়া বাহনত আহি কাপোৰৰ ব্য়ৱসায়িক প্ৰতিষ্ঠানৰ পৰা দাবী কৰা ধন নিবলৈ আহি গুলীচালনা কৰে ৰাইফুল আলী নামৰ এগৰাকী ব্যৱসায়ীক।
ঘটনাস্থলীত উপস্থিত থকা ৰাইজে গুলীচালনাৰ ঘটনাত হতভম্ব হৈ পৰে যদিও ৫জনীয়া দুৰ্বৃত্তৰ চামচুল হক নামৰ এজন দুৰ্বৃত্তক কৰায়ত্ত কৰি দাৰে ঘপিয়াই আহত কৰে। সংকটজনক অৱস্থাত দুয়োগৰাকী আহতক চিকিৎসাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হৈছে।
স্থানীয় লোকৰ ভাষ্য অনুসৰি, দুৰ্বৃত্তৰ দলটোৱে ব্যৱসায়িক প্ৰতিষ্ঠানখনত সোমাই ৰায়ফুল আলীক লগত উঠাই নিয়াৰ চেষ্টা চলাই যদিও আলীয়ে হকা-বাধা কৰাত গুলীচালনা কৰে। ঘটনাস্থলীত আৰক্ষী উপস্থিত হৈ তদন্ত আৰম্ভ কৰিছে।