নিয়মীয়া বাৰ্তা, ৬ এপ্ৰিলঃ বজালী জিলাৰ এখন গুৰুত্বপূৰ্ণ পৌৰসভা হৈছে পাঠশালা পৌৰসভা৷ এই পৌৰসভাখন আজি বিজেপি-অগপ মিত্ৰজোঁটে গঠন কৰি শপত লয়৷ দহটা ৱাৰ্ডেৰে গঠিত পাঠশালা পৌৰসভাৰ নিৰ্বাচনত বিজেপিয়ে চাৰিটা, অগপই এটা আৰু নিৰ্দলীয় প্ৰাৰ্থীয়ে পাঁচটা ৱাৰ্ডত জয়লাভ কৰে৷ পিছলৈ দুগৰাকী নিৰ্দলীয়ই বিজেপিত যোগদান কৰাত বিজেপিৰ সংখ্যা ৬গৰাকীলৈ বৃদ্ধি হয়৷ আৰু সেইমৰ্মে কালি বিজেপি-অগপ মিত্ৰজোঁটে পাঠশালা পৌৰসভাৰ পৌৰপতি হিচাপে জলি চৌধুৰীক বাছনি কৰাৰ লগতে অগপৰ ৰাতুল ৰয়ক উপ-পৌৰপতি হিচাপে বাছনি কৰে৷ ইয়াৰ পিছতে আজি নিৰ্বাচিত ৱাৰ্ড কমিছনাৰসকলক আজি শপতবাক্য পাঠ কৰোৱা হয়৷ বজালী ৰাজহ চক্ৰ বিষয়া কাকুমণি শইকীয়াই প্ৰথমতে শপত দিয়ে ৱাৰ্ড কমিছনাৰ দিগন্ত তালুকদাৰক৷ ইয়াৰ পিছত দিগন্ত তালুকদাৰে অন্যসকলক শপত গ্ৰহণ কৰায়। আজিৰ এই অনুষ্ঠানত মন্ত্ৰী ৰঞ্জিত কুমাৰ দাসে উপস্থিত থাকি ৱাৰ্ড কমিছনাৰসকলক পাঠশালা পৌৰসভাৰ কামসমূহ ভালদৰে কৰিবলৈ আহ্বান জনায়। পাঠশালা পৌৰসভাৰ মুখ্য অভিযন্তা যতীন তালুকদাৰে আঁত ধৰা এই অনুষ্ঠানত বজালী জিলা উপায়ুক্ত ভাৰত ভূষণ দেৱ চৌধুৰীৰ লগতে বিজেপি নেতা নগেন চৌধুৰী, সঞ্জীৱ শৰ্মা আদি উপস্থিত থাকে৷ প্ৰণিধানযোগ্য যে সদ্যঘোষিত পৌৰসভা নিৰ্বাচনত পাঠশালা নগৰৰ ৩নং ৱাৰ্ডৰ পৰা নিৰ্বাচিত হৈ অহা বিজেপিৰ জেষ্ঠ্যা সদস্য জলি চৌধুৰীয়ে দীৰ্ঘদিন ধৰি দলত বিভিন্নধৰণে সেৱা আগবঢ়াই আহিছে ৷ পাঠশালাৰ পাঠলা গাঁও নিৱাসী চৌধুৰীয়ে দলৰ প্ৰতি আগবঢ়োৱা সেৱাৰ বাবে আজি দলে তেওঁক কৃতজ্ঞতাৰ চিনস্বৰূপে পাঠশালা পৌৰসভাৰ বাবে পৌৰপতি হিচাপে মনোনীত কৰে৷ উল্লেখ্য যে পাঠশালা পৌৰসভাৰ পৌৰপতি পদটো এইবাৰ মহিলাৰ বাবে সংৰক্ষণ কৰা হৈছে৷ আনহাতে নগৰখনৰ ১নং ৱাৰ্ডৰ পৰা নিৰ্বাচিত হৈ অহা অগপ দলৰ সক্ৰিয় কৰ্মী তথা পাটাছাৰকুছি বিধান সভা সমষ্টি সমিতিৰ সম্পাদক ৰাতুল ৰয়ক উপ -পৌৰপতি হিচাপে মনোনীত কৰা হয়৷ উল্লেখ যে পাঠশালা নগৰৰ জ্যোতিনগৰ নিৱাসী ৰাতুল ৰয় পূৰ্বেও ১নং ৱাৰ্ডৰ পৰা নিৰ্বাচিত হৈছিল৷
প্ৰেৰক কল্যাণ কলিতা